Dy punonjëse të Posta Shqiptare në Devoll janë vënë nën procedim penal, pasi dyshohet se për disa muaj kanë përvetësuar një shumë të konsiderueshme parash nga fondet publike, të destinuara kryesisht për pensione dhe ndihmë ekonomike.
Sipas policisë, në qendër të hetimit janë Paola Shaholli nj29 vjeçe, përgjegjëse e zyrës postare të Vishocicës, dhe një 27 vjeçe, arkëtare-llogaritare në degën postare të Devollit, të dyja banuese në Bilisht.
Dyshohet se gjatë periudhës shtator 2025 deri në janar 2026, ato kanë vepruar në bashkëpunim për të përvetësuar rreth 22 milionë lekë të rinj (~250 000 euro).
Nga hetimet paraprake rezulton se përgjegjësja e zyrës postare ka shpërdoruar fondet e pensioneve dhe të ndihmës ekonomike, kryesisht të përfituesve që jetonin jashtë Shqipërisë.
Për realizimin e skemës, ajo dyshohet se ka falsifikuar nënshkrimet e përfituesve, duke tërhequr paratë në emër të tyre.
Ndërkohë, arkëtarja dyshohet se ka ndërhyrë në dokumentacionin financiar, duke manipuluar dhe falsifikuar mandatpagesat, si në librat e arkës ashtu edhe në sistemin e menaxhimit të parave cash. Këto veprime, sipas policisë, janë kryer për të mbuluar dhe favorizuar përvetësimin e fondeve.
Autoritetet bëjnë me dije se hetimet për rastin janë në vijim, ndërsa po punohet për dokumentimin e plotë të skemës dhe për rikuperimin e shumës së dyshuar të përvetësuar. /skyweb.al
