Shqipëria po përpiqet të konsolidohet si një destinacion konkurrues në rajon për turizmin shëndetësor edhe pse jemi ende në hapat e para.
Të dhënat e vitit 2024 tregojnë rritje të qëndrueshme të këtij sektori, me një numër në rritje pacientësh të huaj që vijnë për trajtime mjekësore në vend, për shkak të çmimeve të ulëta dhe cilësisë së shërbimeve në klinikat private, shkruan skyweb.al.
Sipas të dhënave të Ministrisë së Turizmit dhe INSTAT, gjatë vitit 2024 në Shqipëri mbërritën 11.7 milionë turistë të huaj, me një rritje prej 15.2% krahasuar me një vit më parë. Besohet se një përqindje e konsiderueshme e këtij fluksi kanë përdorur shërbime shëndetësore, duke përfshirë kryesisht trajtime dentare dhe ndërhyrje estetike.
Shërbimet më të kërkuara nga pacientët e huaj
Të dhënat nga sektori privat tregojnë se stomatologjia, veçanërisht implantet dentare dhe trajtimet estetike, mbetet ndër shërbimet më të kërkuara. Çmimet për një implant dentar në Shqipëri variojnë mesatarisht nga 300 deri në 500 euro, ndërkohë që në vendet e Bashkimit Evropian ato shkojnë nga 1000 deri në 2000 euro.
Një tjetër fushë me kërkesë të lartë është kirurgjia estetike, përfshirë rinoplastikën, liposuksionin dhe liftingun e fytyrës.
Pacientët vijnë kryesisht nga Kosova, Italia dhe diaspora shqiptare në vendet perëndimore.
Ndërkohë, transplanti i flokëve po bëhet gjithashtu një shërbim gjithnjë e më i kërkuar. Procedurat FUE dhe DHI ofrohen në çmime që variojnë nga 1500 deri në 2500 euro.
Përveç tyre, një pjesë e pacientëve kërkojnë fizioterapi dhe shërbime rehabilitimi, veçanërisht pas ndërhyrjeve ortopedike apo aksidenteve.
Të ardhura në rritje dhe infrastrukturë në zhvillim
Sipas një analize të Qendrës për Zhvillim Ekonomik Rajonal, të ardhurat e gjeneruara nga turizmi shëndetësor në Shqipëri gjatë vitit 2024 vlerësohen në 35 deri në 40 milionë euro. Kjo rritje lidhet me çmimet konkurruese, në disa raste 60-70% më të ulëta se në vendet e BE-së, dhe me aksesin më të shpejtë shërbimi, pa lista të gjata pritjeje.
Aktualisht, në vend operojnë rreth 25 klinika dhe spitale private që ofrojnë shërbime të strukturuara për turistët shëndetësorë në qytete si Tirana, Durrësi, Vlora dhe Shkodra.
Disa prej tyre kanë lidhje të drejtpërdrejta me agjenci turistike që ofrojnë paketa të kombinuara, ku përfshihet akomodimi, transporti dhe trajtimi mjekësor.
Megjithatë, mungon ende një strategji e unifikuar shtetërore për promovimin ndërkombëtar të Shqipërisë si destinacion për turizëm shëndetësor./skyweb.al
