Autoriteti i Konkurrencës ka miratuar një rregullore të re për përjashtimin nga ndalimi ligjor i disa marrëveshjeve të specializimit mes ndërmarrjeve.
Përfitimi i përjashtimit në bllok i vendosur nga rregullorja është i kufizuar në rastet kur palët janë aktive në të njëjtin treg produkti.
Megjithatë, përjashtimi i vendosur nga kjo rregullore nuk duhet të zbatohet për marrëveshjet që përmbajnë kufizime të cilat nuk janë të domosdoshme për arritjen e efekteve pozitive të krijuara nga një marrëveshje specializimi.
Marrëveshja e specializimit është një marrëveshje ndërmjet dy ose më shumë palëve që janë aktive në të njëjtin treg produkti, ku ato bien dakord të ndërpresin ose të heqin dorë nga prodhimi i produkteve të caktuara ose të heqin dorë nga prodhimi i këtyre produkteve dhe t’i blejnë ato nga një ose më shumë palë të tjera, të cilat bien dakord t’i prodhojnë dhe t’i furnizojnë ato.
Përjashtimi zbatohet edhe për marrëveshjet e specializimit që përmbajnë dispozita që lidhen me transferimin ose licencimin e të drejtave të pronësisë intelektuale tek një ose më shumë nga palët, me kusht që këto dispozita të lidhen drejtpërdrejt dhe të jenë të nevojshme për zbatimin e marrëveshjes.
Përjashtimi do të zbatohet me kusht që pjesa e kombinuar e tregut të palëve të mos kalojë 20% në tregun apo tregjet përkatëse, të cilave u përkasin produktet e specializimit.
Pjesët e tregut do të llogariten në bazë të vlerës së shitjeve të pjesëve në treg. Nëse të dhënat e vlerës së shitjeve në treg nuk janë të disponueshme, mund të përdoren vlerësime të bazuara në informacione të tjera të besueshme të tregut, duke përfshirë vëllimet e shitjeve në treg.
Pjesët e tregut do të llogariten në bazë të të dhënave të vitit kalendarik paraardhës ose, kur viti kalendarik paraardhës nuk është përfaqësues i pozicionit të palëve në tregjet përkatëse, pjesët e tregut do të llogariten si një mesatare e pjesëve të tregut të palëve për tre vitet kalendarike paraardhëse.
Rregullorja saktëson shprehimisht se përjashtimi nuk do të zbatohet për marrëveshjet e specializimit, të cilat, drejtpërdrejt ose tërthorazi, kanë si objekt fiksimin e çmimeve në shitjen e produkteve të specializimit tek palët e treta, me përjashtim të fiksimit të çmimeve për t’u paguar nga klientët e drejtpërdrejtë në kontekstin e shpërndarjes së përbashkët apo kufizimin e prodhimit ose shitjeve (me përjashtim të dispozitave për sasinë e produkteve të rëna dakord në kontekstin e marrëveshjeve të specializimit të njëanshme ose reciproke).
Në çdo rast, Komisioni i Konkurrencës mund të revokojë përfitimin nga përjashtimi sipas kësaj Rregulloreje, në veçanti kur tregu përkatës ka përqendrim të lartë dhe konkurrenca tashmë është e dobët. /Monitor
