Ministria e Infrastrukturës dhe Energjisë ka miratuar udhëzimin që përcakton mënyrën e zbatimit të sistemeve inteligjente të transportit në të gjithë rrjetin rrugor të vendit, në funksion të rritjes së sigurisë dhe përmirësimit të menaxhimit të trafikut.
Dokumenti parashikon krijimin dhe funksionimin e një sërë shërbimesh digjitale, përfshirë informacionin në kohë reale mbi trafikun, planifikimin e udhëtimeve multimodale, sistemet e paralajmërimit të hershëm, si dhe eCall, thirrjen automatike të emergjencës nga automjetet në rast aksidenti.
Po ashtu, udhëzimi përfshin edhe shërbimet për parkimet e sigurta të automjeteve tregtare, duke synuar rritjen e sigurisë për transportin e mallrave dhe drejtuesit profesionistë.
Të dhënat mbi rrjetin rrugor dhe qarkullimin do të bëhen të aksesueshme për publikun dhe operatorët përmes Pikës Kombëtare të Aksesit, e cila do të administrohet nga Autoriteti Rrugor Shqiptar.
Kjo pikë do të shërbejë si platformë qendrore për shpërndarjen dhe shkëmbimin e informacionit rrugor.
Udhëzimi vendos detyrime të reja për institucionet publike dhe operatorët privatë, të cilët do të duhet të përditësojnë, standardizojnë dhe ndajnë të dhënat që lidhen me rrugët, trafikun, incidentet dhe infrastrukturën e transportit.
Në dokument theksohet edhe mbrojtja e të dhënave personale. Informacionet e mbledhura nga sistemet inteligjente duhet të jenë të anonimizuara ose të pseudonimizuara, në përputhje me legjislacionin në fuqi për mbrojtjen e të dhënave.
Miratimi i këtij udhëzimi synon afrimin e Shqipërisë me standardet e Bashkimit Europian për menaxhimin modern të trafikut dhe rritjen e sigurisë rrugore.
Ndërkohë, ky vendim vjen pas raportit vjetor të Komunitetit të Transportit, i cili vlerëson se Shqipëria ka arritur një nivel zbatimi prej 44 për qind në fushën e sistemeve inteligjente të transportit.
Sipas raportit, Qendra Kombëtare e Monitorimit të Trafikut është ndërtuar dhe pajisur, ndërsa vijojnë punimet për instalimin e kamerave dhe sistemeve inteligjente përgjatë rreth 200 kilometrave të rrjetit rrugor kryesor të vendit. /skyweb.al
