Banorët e Durrësit janë rikthyer në protestë para bashkisë së qytetit kundër projektit TID, një nismë qeveritare që synon transformimin e zonës arkeologjike në një park të madh urban.
Gjatë ditës së sotme është zhvilluar edhe një takim në ambientet e bashkisë për të diskutuar mbi projektin, ku ka marrë pjesë edhe kryeministri Edi Rama. Megjithatë, banorët që protestonin jashtë nuk kanë mundur të afrohen për të komunikuar drejtpërdrejt me të.
Situata ka sjellë tensione, ndërsa mbledhja e Këshillit Bashkiak është shtyrë në kushtet e debatit të fortë publik rreth projektit.
Sipas planit, TID parashikon restaurimin e elementëve historikë dhe riorganizimin e infrastrukturës rrugore në zonë. Por një pjesë e banorëve kanë shprehur shqetësim, duke deklaruar se ndërhyrjet mund të çojnë në prishjen e banesave të tyre dhe zhvendosje të detyruar.
Projekti vijon të mbetet në qendër të debatit mes autoriteteve dhe komunitetit lokal, ndërsa kërkesat për transparencë dhe garanci për pronat private mbeten në fokus të reagimeve qytetare. /skyweb.al
