Guvernatori i Bankës së Shqipërisë, Gent Sejko, e cilësoi emigracionin dhe plakjen e popullsisë si një nga sfidat më serioze për të ardhmen ekonomike të vendit, duke theksuar se ndryshimet demografike po shndërrohen gjithnjë e më shumë në një problem strukturor.
Sipas tij, ndërsa në të kaluarën emigracioni është parë si një faktor që lehtësonte papunësinë dhe varfërinë, sot ai po krijon mungesa të dukshme të fuqisë punëtore, në një kohë kur ekonomia po rritet dhe papunësia ndodhet në nivele historikisht të ulëta.
Këto zhvillime, sipas Sejkos, po ndikojnë drejtpërdrejt te bizneset, familjet dhe perspektiva afatgjata e rritjes ekonomike.
Guvernatori theksoi se demografia përbën një forcë themelore për zhvillimin dhe prosperitetin e çdo shoqërie, ndërsa aktualisht po përjetohet një pikë kthese globale.
Gjithnjë e më pak persona hyjnë në tregun e punës, ndërkohë që rritet numri i atyre që varen nga sistemet e pensioneve dhe të kujdesit shëndetësor, duke ushtruar presion mbi produktivitetin, financat publike dhe prioritetet politike.
Sejko bëri të ditur se Banka e Shqipërisë i ka analizuar këto zhvillime prej gati një dekade, duke identifikuar herët plakjen e popullsisë dhe emigracionin si faktorë përcaktues për të ardhmen ekonomike të vendit. Sipas tij, transformimi i shpejtë demografik po riformëson strukturën ekonomike dhe sociale të Shqipërisë.
Ai vlerësoi se pavarësisht këtyre sfidave, ekonomia shqiptare ka treguar qëndrueshmëri vitet e fundit, e mbështetur nga inflacioni i ulët, rritja e qëndrueshme ekonomike, zgjerimi i punësimit, rritja e pagave dhe përmirësimi i llogarisë korrente.
Tregu i punës, sipas tij, ka shënuar përmirësime të ndjeshme, me rënie të papunësisë në nivele historikisht të ulëta dhe rritje të produktivitetit krahasuar me periudhën para krizës financiare globale.
Guvernatori nënvizoi se Banka e Shqipërisë ka luajtur një rol të rëndësishëm në këto zhvillime përmes një politike monetare të kujdesshme dhe proaktive, të orientuar drejt ruajtjes së stabilitetit të çmimeve dhe mbrojtjes së fuqisë blerëse.
Ai shtoi se analizat për Shqipërinë janë në përputhje me gjetjet më të gjera për vendet në zhvillim të Evropës, ku plakja e popullsisë dhe tkurrja e fuqisë punëtore po kufizojnë potencialin e rritjes ekonomike.
Këto deklarata u bënë gjatë prezantimit të Raportit të Tranzicionit 2025–2026 të Bankës Europiane për Rindërtim dhe Zhvillim, i cili këtë vit fokusohet te ndikimi i ndryshimeve demografike në ekonomi dhe shoqëri. /skyweb.al
