Një pjesë e madhe e popullsisë shqiptare ka përjetuar emigrimin në një moment të jetës, duke e renditur Shqipërinë ndër vendet me nivelin më të lartë të eksperiencës së migrimit në rajon.
Sipas Raportit të Tranzicionit të Bankës Evropiane për Rindërtim dhe Zhvillim, Shqipëria tejkalon ndjeshëm vendet e tjera të Evropës Qendrore dhe Juglindore për sa i përket përqindjes së qytetarëve që kanë jetuar jashtë vendit.
Të dhënat bazohen në një anketë të realizuar nga Banka Kombëtare Austriake, e cila ka analizuar modelet e migrimit të përsëritur në Shqipëri, Bosnjë dhe Hercegovinë, Bullgari, Çeki, Hungari, Maqedoninë e Veriut, Poloni, Rumani dhe Serbi.
Mesatarisht, 15 për qind e të anketuarve në këto vende deklarojnë se kanë jetuar jashtë vendit. Shqipëria kryeson bindshëm këtë tregues, me rreth 30 për qind të popullsisë që raporton përvojë emigrimi, ndërsa në Hungari kjo shifër zbret në vetëm 7 për qind.
Nga qytetarët shqiptarë që kanë qenë në emigrim, rreth 16 për qind janë kthyer dhe nuk planifikojnë të largohen sërish. Në të kundërt, afro 14 për qind kanë jetuar jashtë, janë rikthyer dhe po planifikojnë një emigrim të dytë, duke reflektuar natyrën ciklike të migrimit.
Raporti tregon se një e treta e periudhave të migrimit kanë zgjatur më pak se një vit. Qëndrimet afatgjata, mbi tre vjet, rezultojnë më të shpeshta në Bosnjë dhe Hercegovinë, ku 46 për qind e të anketuarve raportojnë emigrim të gjatë.
Në Shqipëri dhe Maqedoninë e Veriut, emigrantët e kthyer shfaqin prirje më të lartë për të emigruar sërish. Njëkohësisht, shkalla e papunësisë rezulton më e lartë te individët me përvojë emigrimi, krahasuar me ata që nuk kanë emigruar kurrë, edhe kur merren në konsideratë faktorë të tjerë sociodemografikë.
Sipas raportit, kjo lidhet me vështirësitë që të kthyerit hasin në procesin e riintegrimit në tregun vendas të punës, ku shpesh aftësitë dhe përvoja e fituar jashtë vendit nuk përthithen plotësisht.
BERZH thekson se këto zhvillime nënvizojnë nevojën për politika më efektive që mbështesin riintegrimin e emigrantëve të kthyer, duke shfrytëzuar aftësitë profesionale, rrjetet ndërkombëtare dhe potencialin sipërmarrës që ata sjellin me vete.
Sipas raportit, migrimi nuk është domosdoshmërisht një proces me një drejtim. Shumë individë lëvizin disa herë gjatë jetës, duke u kthyer dhe duke u larguar sërish, në varësi të mundësive ekonomike, rrethanave familjare dhe perspektivave të karrierës. Ky model ciklik po kthehet në një tipar gjithnjë e më të dukshëm të migrimit në rajon. /skyweb.al
