Shtetet e Bashkuara të Amerikës njoftuan sot se do të zhvillojnë manovra ajrore disa ditore në Lindjen e Mesme, në një kohë tensionesh të shtuara mes Uashingtonit dhe Teheranit, të lidhura me shtypjen vdekjeprurëse të protestave antiqeveritare në Iran.
Një ditë më parë, ushtria amerikane konfirmoi mbërritjen në rajon të aeroplanmbajtëses “Abraham Lincoln”, duke sinjalizuar forcimin e pranisë ushtarake amerikane.
“Manovrat do të demonstrojnë aftësinë për të dislokuar, shpërndarë dhe mbajtur fuqi ajrore luftarake në të gjithë Lindjen e Mesme”, thuhet në një deklaratë të komponentit ajror të Komandës Qendrore të ushtrisë amerikane (CENTCOM).
Autoritetet amerikane nuk kanë dhënë detaje mbi datat apo vendndodhjet e sakta të zhvillimit të këtyre manovrave.
Presidenti amerikan, Donald Trump, ka kërcënuar në disa raste se do të ndërmarrë veprime ushtarake kundër Iranit si reagim ndaj shtypjes së protestave në muajin janar. Megjithatë, më pas ai ka dhënë sinjale tërheqjeje, pasi deklaroi se Teherani kishte pezulluar ekzekutimet e planifikuara të disa protestuesve. /skyweb.al
