Guvernatori i Bankës së Shqipërisë, Gent Sejko, zhvilloi sot një takim zyrtar me Drejtoreshën e re Ekzekutive të Autoritetit të Mbikëqyrjes Financiare, Adela Xhemali, në fokus të të cilit ishin zhvillimet ekonomike dhe bashkëpunimi institucional në sektorin financiar.
Sipas njoftimit të Bankës së Shqipërisë, gjatë takimit u diskutua situata aktuale e ekonomisë së vendit, performanca e aktivitetit ekonomik, gjendja e sistemit financiar dhe pritshmëritë për periudhën afatmesme.
Guvernatori Sejko prezantoi gjithashtu masat e fundit rregullatore të ndërmarra nga Banka e Shqipërisë në fushën e mbikëqyrjes bankare, të orientuara drejt forcimit të mbrojtjes së konsumatorëve dhe rritjes së transparencës në raportet mes institucioneve financiare dhe klientëve.
Një tjetër temë e rëndësishme e diskutimit ishte ndërthurja gjithnjë e më e madhe mes sektorit bankar dhe atij jobankar, në kushtet e krijimit të grupeve financiare me aktivitet të përbashkët ndërsektorial. Në këtë kuadër, palët vlerësuan si të domosdoshëm shkëmbimin e informacionit mbi mënyrën e përgatitjes së statistikave dhe forcimin e koordinimit mbikëqyrës, për të identifikuar dhe parandaluar në kohë rreziqet që mund të cënojnë stabilitetin financiar.
Në funksion të procesit të integrimit evropian, u theksua nevoja për bashkëpunim të vazhdueshëm ndërinstitucional për përmbushjen e detyrimeve që burojnë nga negociatat me Bashkimin Evropian. Në mënyrë të veçantë, bashkëpunimi mes Bankës së Shqipërisë dhe AMF-së lidhet me Kapitullin 9 “Shërbimet Financiare”, Kapitullin 4 “Lëvizja e lirë e kapitalit” dhe Kapitullin 17 “Politika ekonomike dhe monetare”.
Në përfundim, Guvernatori Sejko rikonfirmoi gatishmërinë e Bankës së Shqipërisë për të vijuar një bashkëpunim të qëndrueshëm dhe funksional me Autoritetin e Mbikëqyrjes Financiare, në mbështetje të stabilitetit makroekonomik dhe financiar të vendit.
