Ideja se mosha e mesme po zhvendoset gjithnjë e më vonë ka nxitur diskutime të shumta mbi plakjen, mënyrën e jetesës dhe pritshmëritë për të ardhmen.
Një shkrimi i publikuar nga The Wall Street Journal, qe trajtonte fenomenin e grave që po bëhen nëna në të 40-at, ndjekin studime pasuniversitare, jetojnë më gjatë dhe blejnë shtëpi në një moshë më të vonë, ka gjeneruar reagime të shumta nga lexuesit.
Shumica e tyre ndanë përvojat personale mbi sfidat dhe kënaqësitë e kalimit të viteve, duke reflektuar mbi atë që kanë arritur dhe atë që i pret në të ardhmen. Komentet tregojnë se perceptimi për moshën po ndryshon, ndërsa gjithnjë e më shumë njerëz e shohin dekadën e të 40-ave si një periudhë plot mundësi, e jo si fillimin e plakjes.
Një prej komenteve që tërhoqi vëmendje ishte ai i Stevie Newendyke, një i ri në të 20-at, i cili shkroi se mezi pret të hyjë në të 30-at dhe të 40-at.
“Shumë nga kolegët e mi janë në këtë grupmoshë. Është një kombinim i mirë i energjisë rinore dhe stabilitetit emocional, madje edhe financiar, që vështirë se mund ta kesh në të 20-at. Mosha është vetëm një numër, nëse kujdesesh të shijosh jetën”, shprehet ai.
Sipas tij, aktiviteti fizik, vazhdimi i hobive, udhëtimet, vendosja e objektivave dhe kujdesi për marrëdhëniet personale janë çelësi për ta jetuar mirë çdo etapë të jetës.
“Ajo që nuk duhet bërë kurrë është të biesh në kurthin e dorëzimit vetëm sepse po plakesh”, përfundon ai.
Debati pasqyron një ndryshim të dukshëm në mënyrën se si shoqëria e percepton moshën. Jetëgjatësia më e lartë, ndryshimet në karrierë, shtyrja e krijimit të familjes dhe zhvillimet në stilin e jetesës kanë bërë që shumë njerëz ta shohin moshën 40-vjeçare jo si fundin e rinisë, por si fillimin e një etape të re, më të qëndrueshme dhe më të pasur me mundësi. /skyweb.al
