Shkencëtarët kanë konfirmuar se kontinenti afrikan po ndahet gradualisht në dy pjesë si pasojë e një procesi të fuqishëm tektonik, i cili po zhvillohet më shpejt sesa ishte parashikuar më parë, raportojnë burime shkencore të cituara nga Euronews.
Në qendër të këtij fenomeni ndodhet Sistemi i Riftit të Afrikës Lindore, që shtrihet nga Deti i Kuq deri në Mozambik. Ky sistem po çan kontinentin përgjatë vijave të thella gjeologjike dhe, brenda 5 deri në 10 milionë vjetësh, mund të çojë në formimin e një oqeani të ri mes Afrikës Lindore dhe asaj Perëndimore.
Të dhënat më të fundit nga NASA, Universiteti i Rochester dhe Shërbimi Gjeologjik i SHBA-së tregojnë se korja e Tokës në këtë rajon po hollohet dhe po çahet njëkohësisht në disa pika. Në disa zona janë zbuluar edhe shenja të hershme të formimit të korës oqeanike, çka tregon se procesi ka kaluar nga faza kontinentale drejt asaj detare.
Matjet satelitore kanë regjistruar zgjerim të dukshëm të luginave dhe çarjeve ndër vite. Edhe pse ky proces është jashtëzakonisht i ngadaltë për t’u vërejtur në jetën e përditshme, teknologjia GPS po mundëson matjen e tij në kohë reale me saktësi milimetrike.
Gjeofizikanët e konsiderojnë Afrikën Lindore si një “laborator natyror”, ku mund të vëzhgohet drejtpërdrejt ndarja e një kontinenti. Një nga ngjarjet më të spikatura u shënua në vitin 2005, kur në shkretëtirën e Etiopisë u hap brenda pak ditësh një çarje rreth 56 kilometra e gjatë.
Zona më aktive ndodhet në rajonin Afar të Etiopisë, ku takohen tri pllaka tektonike: Nubiane, Somaliane dhe Arabe. Ky bashkim trefish krijon tensione të mëdha, të shoqëruara me tërmete të shpeshta dhe aktivitet të shtuar vullkanik.
Sipas shkencëtarëve, pulsimet e magmës nga manteli i Tokës luajnë një rol kyç në përshpejtimin e procesit të çarjes. Përveç rreziqeve sizmike dhe vullkanike për zonat e banuara dhe infrastrukturën, ky fenomen sjell edhe mundësi ekonomike.
Aktiviteti tektonik përfaqëson një burim të rëndësishëm të energjisë gjeotermale, të cilën vende si Kenia po e shfrytëzojnë gjithnjë e më shumë. Në planin afatgjatë, pritet që ujërat e Detit të Kuq dhe Gjirit të Adenit të përmbytin luginën e riftit, duke krijuar një oqean të ri dhe duke ndryshuar përgjithmonë hartën gjeografike të Afrikës. /skyweb.al
