Të ardhurat nga taksa e ndikimit në infrastrukturë në Bashkinë e Tiranës ranë me 2.3 herë gjatë vitit të kaluar, krahasuar me një vit më parë.
Të dhënat zyrtare nga buxheti i bashkisë së kryeqytetit tregojnë se nga 147.5 milionë euro që u mblodhën në vitin 2024, të ardhurat nga taksa e ndikimit në infrastrukturë ranë në 65 milionë euro vitin e kaluar (1 euro=97 lekë).
Viti 2024 shënoi një rekord në lejet e ndërtimit në kryeqytet, teksa bashkia dhe KKT dhanë leje për 1.9 milionë metra katrorë ndërtime të reja, me një vlerë të parashikuar investimi prej 1.8 miliardë euro. Por ndonëse 2024 ishte një vit rekord, viti 2025 ka rezultuar në ekstremin tjetër.
Të dhënat tregojnë se të ardhurat e mbledhura nga taksa e ndikimit në infrastrukturë për vitin e kaluar ishin më të ulëta edhe se sa tre vjet më parë, e madje rezultuan 22 për qind më të ulëta edhe se sa vet plani i bashkisë.
Sipas buxhetit, Bashkia e Tiranës ishte parashikuar të mblidhte 8 miliardë lekë ose rreth 82.5 milionë euro të ardhura nga taksa e ndikimit në infrastrukturë, por shifra faktike e mbledhur rezultoi vetëm 65 milionë euro.
Taksa e ndikimit në infrastrukturë është e lidhur direkt me vrullin e ndërtimeve të reja. Për Tiranën, taksa e ndikimit në infrastrukturë është në nivelin 8% dhe llogaritet për metër katror mbi çmimet e referencës, të cilat u rritën ndjeshëm në gushtin e vitit 2023.
Nuhatje apo?
Rënia e fortë gjatë vitit të kaluar e të ardhurave që mblidhen nga kjo taksë, është një sinjal i drejtëpërdrejtë se euforia në tregun e ndërtimit është duke u zmbrapsur.
Aktualisht në treg është duke ndodhur edhe një fenomen i lejeve që ngelen thjesht në PDF. Shumë kompani pasi marrin lejet ndërtimi, të cilat qeveria i lëshon pa asnjë kriter janë duke u stopuar në pagesën e taksës së ndikimit.
Ky fenomen po rezulton masive veçanërisht tek lejet për kullat e larta, ku qeveria miraton lejet, por ndërtimi nuk fillon pasi ndërtuesit nuk shkojnë të paguajnë taksën e ndikimit në infrastrukturë.
A është rënia e fortë e të ardhurave nga taksa e ndikimit në infrastrukturë, rezultat i kthimit të tregut në ekuilibër nga nivelet e çmendurisë ku kishte arritur? Apo është një sinjal se ndërtuesit kanë filluar të nuhasin shtrëngim në treg.
Kjo mbetet për t’u parë në vijim, por pas verës së vitit të kaluar, kryeministri Edi Rama bëri disa herë thirrje publike për qytetarët që të blejnë banesa sepse çmimet e tyre do të rriten ndjeshëm kur vendi të hyjë në BE. Dy indicie bëjnë një provë, thotë një proverb italian.
Tashmë një gjë duket e sigurtë. Kurba e euforisë në ndërtim e ka kaluar pikun dhe tashmë ndodhet në pjerrtësinë rënëse. /kapitali.al
*Titulli është i redaksisë
