Inteligjenca artificiale mund të krijojë poezi dashurie dhe të zhvillojë biseda që duken romantike, por lind pyetja: a është në gjendje një makinë të dashurojë vërtet?
Shembujt janë të shumtë. Në Kanada, një burrë i propozoi një avatari virtual të quajtur Saia, duke deklaruar se ishte i dashuruar me të. Një e re amerikane, e njohur me pseudonimin Ayrin, pranoi se kishte pasur një lidhje romantike me një chatbot të quajtur Leo. Madje, një studim i vitit 2024 tregon se rreth 40% e përdoruesve të aplikacionit Replika – që ofron shoqëri virtuale me AI – raportojnë ndjenja romantike ndaj chatbot-it të tyre. Megjithatë, specialistët theksojnë se këto ndjenja janë të njëanshme, pasi përgjigjet e chatbot-eve janë produkte algoritmesh dhe jo emocione të vërteta.
“Shumë chatbot-e paraqiten si njerëz, gjë që mund të krijojë konfuzion tek përdoruesit”, shprehet Renwen Zhang, profesore në Institutin Kombëtar të Singaporit. Sipas saj, kjo është një strategji për të rritur përfshirjen dhe besimin e përdoruesve, por mund të sjellë pasoja emocionale.
Studimet shkencore mbi trurin dhe biologjinë njerëzore tregojnë se dashuria lidhet ngushtë me procese kimike dhe hormone si dopamina dhe oksitocina. Ndërsa AI mund të simulojë disa procese mendore dhe të imitojë gjuhën e ndjenjave, ajo nuk i përjeton ato në mënyrë reale.
Ekspertët bien dakord se marrëdhëniet mes njerëzve dhe AI-së janë të njëanshme dhe nuk mund të zëvendësojnë lidhjet autentike njerëzore. Edhe pse disa persona mund të gjejnë përkohësisht ngushëllim në ndërveprimin me inteligjencën artificiale, kjo nuk kontribuon në zhvillimin e aftësive sociale dhe të marrëdhënieve reale.
Në fund, pavarësisht aftësisë së AI-së për të krijuar iluzionin e afeksionit dhe për të shkruar fjalë të ndjera, dashuria e vërtetë mbetet një përvojë thellësisht njerëzore, e cila nuk mund të përjetohet nga makinat. /skyweb.al
