Korridori VIII është përfshirë zyrtarisht në infrastrukturën kritike ushtarake të NATO-s, duke u njohur si korridor sigurie për mbrojtjen kolektive të Aleancës.
Lajmi u bë i ditur nga kryeministri Edi Rama, i cili publikoi detaje mbi veprat infrastrukturore që janë studiuar, projektuar dhe po zbatohen si pjesë e këtij korridori strategjik.
Sipas tij, segmenti me pikënisje në kompleksin portual Durrës-Porto Romano përfshin një seri investimesh të mëdha, si autostrada moderne, ndërtimin e portit strategjik të Porto Romanos dhe linjat hekurudhore të mbështetura nga Bashkimi Evropian.
Rama theksoi se Korridori VIII, pjesë e rrjetit europian TEN-T, tashmë është certifikuar si korridor sigurie për forcat e NATO-s.
Korridori VIII konsiderohet një projekt bërthamë i infrastrukturës rajonale, pasi ndërlidhet me rrjete të tjera të rëndësishme transporti, përfshirë korridoret 4 dhe 9 të rrjetit trans-europian.
Rruga multimodale shtrihet nga portet italiane në Adriatik, kalon nëpër Shqipëri dhe Maqedoninë e Veriut dhe përfundon në portet bullgare në Detin e Zi, duke krijuar një bosht të rëndësishëm lidhjeje mes Adriatikut dhe rajonit të Detit të Zi.
Vendimi për njohjen e tij si korridor sigurie u mor në Bruksel gjatë një takimi të ministrave të Mbrojtjes të vendeve anëtare të NATO-s, ku mori pjesë edhe ministri shqiptar i Mbrojtjes Pirro Vengu.
Përfshirja në arkitekturën e sigurisë së Aleancës e pozicionon Shqipërinë si një nyje strategjike në planet ushtarake dhe logjistike euroatlantike për vitet në vijim./skyweb.al
