Të zgjedhim vezë kafe apo të bardha? Është një pyetje që shumë prej nesh ia bëjnë vetes para rafteve të supermarketit, shkruan metrotoday.it.
Debati rikthehet sa herë bëjmë blerje: shumë konsumatorë besojnë se vezët kafe janë më të shëndetshme, më ushqyese apo më “natyrale” se ato të bardha. Por, sipas nutricionistëve dhe ekspertëve të shkencës së ushqimit, realiteti është shumë më i thjeshtë dhe nuk lidhet me ngjyrën e guaskës, por me faktorë të tjerë si dieta e pulave, kushtet e rritjes dhe freskia e vezës.
Ngjyra e guaskës nuk është tregues i cilësisë ushqyese. Ajo përcaktohet nga gjenetika e pulës. Gjatë formimit të vezës në traktin riprodhues, disa pula prodhojnë pigmente si protoporfirina, që i japin guaskës ngjyrën kafe, ndërsa të tjera – për shkak të linjës së tyre gjenetike – prodhojnë vezë me guaskë të bardhë.
Në praktikë, pulat me pupla të bardha dhe bulë veshi të çelët zakonisht lëshojnë vezë të bardha, ndërsa ato me pupla kafe ose të kuqe zakonisht prodhojnë vezë kafe. Kjo nuk ka lidhje të drejtpërdrejtë me vlerat ushqyese të vezës.
Studimet krahasuese tregojnë se vezët e bardha dhe ato kafe kanë përbërje pothuajse identike. Ndryshimet e vogla që mund të vërehen lidhen më shumë me ushqimin e pulave sesa me ngjyrën e guaskës. Dieta e pasur, mjedisi i rritjes dhe ushqimet e specializuara (si ato të pasura me omega-3) ndikojnë shumë më tepër në cilësinë përfundimtare të vezës.
Ekziston bindja se vezët kafe përmbajnë më shumë proteina apo vitamina, por të dhënat ushqyese për vezët standarde tregojnë se:
Të dyja përmbajnë rreth 6–7 gramë proteina për vezë dhe më pak se 80 kalori.
Janë burim i vitaminave A, D, E dhe K.
Përmbajnë minerale si hekuri dhe seleni.
Janë të pasura me kolinë, e rëndësishme për kujtesën dhe funksionin e trurit.
Sipas ekspertëve të ushqyerjes, nuk ka prova bindëse që një ngjyrë veze është më e shëndetshme se tjetra. Në të dyja rastet, vezët konsiderohen një burim proteinash me cilësi të lartë dhe me vlera të rëndësishme ushqyese.
Pse vezët kafe shpesh kushtojnë më shumë?
Diferenca në çmim lidhet kryesisht me faktorë ekonomikë. Pulat që lëshojnë vezë kafe zakonisht janë raca më të mëdha, që kërkojnë më shumë ushqim dhe kujdes, duke rritur kostot e prodhimit. Historikisht, kjo është reflektuar në çmimin më të lartë në treg.
Megjithëse sot kostot janë më të balancuara, perceptimi i vezëve kafe si “më cilësore” vazhdon të ndikojë në çmimin e tyre.
Zgjedhja mes vezëve kafe dhe të bardha është më shumë çështje preference personale sesa çështje vlere ushqyese.
