Skemat e reja të mbështetjes për fermerët dhe orientimi i prodhimit drejt kërkesës së tregut do të jenë në qendër të politikave të Ministrisë së Bujqësisë dhe Zhvillimit Rural gjatë këtij viti.
Ministri Andis Salla, në një konferencë për mediat, bëri të ditur se skema e re e bujqësisë, me një fond prej 5.2 miliardë eurosh, parashikon risi të veçanta për të rinjtë.
Sipas tij, për çdo të ri nga mosha 18 deri në 35 vjeç që hap një biznes në blegtori, po diskutohet dhënia e granteve në vlerën 7 deri në 10 mijë euro.
Ministri theksoi se synimi është që të rinjtë të përfshihen më aktivisht në sektor, duke u bërë pjesë e paketës së mbështetjes për zhvillimin e bujqësisë dhe rritjen e prodhimit vendas.
Në fokus të politikave mbështetëse do të jetë edhe sektori i perimeve dhe frutave, ku sipas ministrit pritet të vendoset një paketë që mbulon deri në 70 për qind të kostove për mbrojtjen biologjike në sera.
Ai nënvizoi se kjo masë synon rritjen e standardeve të sigurisë ushqimore dhe orientimin e fermerëve drejt praktikave më të qëndrueshme.
Ministri Salla bëri të ditur gjithashtu se po punohet për reformimin e strukturave të Autoritetit Kombëtar të Ushqimit, ndërsa shumë shpejt pritet të nisë ndërtimi i shtatë laboratorëve të rinj.
Sipas tij, këto investime do të forcojnë kontrollin e cilësisë dhe do të rrisin sigurinë në zinxhirin ushqimor, si për prodhimin vendas ashtu edhe për eksportet dhe importet. /skyweb.al
