Policia e Shtetit ka vënë në dispozicion një fond prej rreth 1 milion euro (me TVSH) për shërbimin e rrjetit Datacom, një nga infrastrukturat kryesore të komunikimit të brendshëm dhe transmetimit të të dhënave të strukturave policore.
Procedura e prokurimit është shpallur si tender me klasifikim “Sekret” dhe, sipas dokumentacionit, do të zhvillohet në një formë të ndryshme nga procedurat klasike të prokurimit publik.
Në fazën e parë, që lidhet me para-kualifikimin, autoriteti kontraktor do të përzgjedhë kandidatët që plotësojnë kriteret teknike dhe profesionale përpara dërgimit të ftesës për ofertë. Ky proces nuk lidhet me vlerësimin e çmimit, por fokusohet te përvoja dhe aftësia e operatorëve për të realizuar kontratën, me synimin për të minimizuar rrezikun e moszbatimit të projektit.
Sipas kushteve të përcaktuara, autoriteti kontraktor pritet të ftojë jo më pak se tre kandidatë për të garantuar konkurrencën, përveç rasteve kur numri i interesuarve është më i ulët.
Një nga kriteret kryesore është pajisja e operatorëve me Certifikatë të Sigurimit Industrial (CSI) në nivel jo më të ulët se “Sekret”, e vlefshme në momentin e prokurimit.
Pas përfundimit të para-kualifikimit, faza e dytë parashikon dërgimin e ftesës për ofertë për kandidatët e përzgjedhur, të cilët do të paraqesin ofertat sipas specifikimeve teknike dhe kritereve të përcaktuara në dokumentet e tenderit.
Rrjeti Datacom është infrastruktura e komunikimit të Policisë së Shtetit që lidh drejtoritë, komisariatet dhe sistemet operative në një platformë të sigurt për shkëmbimin në kohë reale të informacionit.
Ai mundëson aksesin në databaza policore, funksionimin e sistemeve të kontrollit kufitar dhe koordinimin e operacioneve, duke përbërë një nga elementët kyç të funksionimit digjital të institucionit. /skyweb.al
