Bllokimi prej disa ditësh i rrugës Librazhd–Përrenjas ka rritur ndjeshëm kostot e transportit ndërqytetës drejt Juglindjes, duke reflektuar edhe në çmimin e biletave të furgonave dhe autobusëve. Devijimi i itinerarit ka zgjatur kohën e udhëtimit dhe ka shtuar shpenzimet për operatorët, të cilat në disa raste po transferohen te pasagjerët.
Nëse më parë udhëtimi Tiranë–Korçë zgjaste rreth 3 orë, aktualisht ai arrin mbi 4 orë, ndërsa në varësi të trafikut mund të zgjatet edhe me 1 orë e 20 minuta. Mjetet po lëvizin përmes itinerarit alternativ Elbasan–Cërrik–Gramsh–Maliq, duke rritur konsumin e karburantit dhe kohën në rrugë.
Sipas operatorëve të transportit, kërkesa për udhëtime ka rënë ndjeshëm, ndërsa shumë mjete qarkullojnë me vetëm 3 ose 4 pasagjerë.
Në disa raste, çmimi i biletës për linjën Tiranë–Korçë ka kaluar nga rreth 700 lekë në 800 deri në 1,000 lekë, ndërsa për Tiranë–Përrenjas është dyfishuar, nga 500 në rreth 1,000 lekë, raporton Monitor.
Shoqata e Transportit Ndërqytetas thekson se zyrtarisht tarifat nuk kanë ndryshuar, pasi përcaktohen me vendim sipas kilometrave, por pranon se mund të ketë raste të izoluara rritjeje për shkak të kostove shtesë.
Situata ka krijuar vështirësi të mëdha për banorët e zonës, të cilët po udhëtojnë kryesisht për nevoja urgjente. Rritja e kohës së udhëtimit dhe kostove po e bën këtë aks një nga më problematikët aktualisht për transportin ndërqytetës drejt Juglindjes.
