Agjencia e Inteligjencës Financiare ka evidentuar një skemë të dyshuar të pastrimit të parave përmes tregut të pasurive të paluajtshme, ku toka të blera me çmime shumë të ulëta janë rishitur brenda një kohe të shkurtër me vlera disa herë më të larta.
Rasti është përfshirë në Raportin Vjetor 2025 të AIF, në tipologjitë e dërguara për investigim të mëtejshëm në organet ligjzbatuese. Sipas raportit, një person me aktivitet në sektorin e ndërtimit rezulton i përfshirë gjatë viteve 2021 deri në 2025 në disa akte noteriale për blerje dhe shitje pasurish të paluajtshme në zona të ndryshme të Tiranës dhe Kavajës.
Pjesa më e dyshimtë e rastit lidhet me rishitjen e pronave brenda pak muajsh me çmime shumë më të larta se vlera e blerjes.
Në një rast konkret, një tokë arë me sipërfaqe 6,200 metra katrorë u shit për 423 mijë euro, ndërkohë që vetëm pak muaj më parë ishte blerë për 30 mijë euro.
Në një rast tjetër, një tokë arë me sipërfaqe 1,850 metra katrorë u shit për 180 mijë euro, ndërsa pak muaj më parë ishte blerë për vetëm 15 mijë euro.
Këto diferenca të mëdha mes çmimit të blerjes dhe çmimit të shitjes janë elementi që ka ngritur alarmin.
Në një treg normal, rritja e vlerës së një prone mund të ndodhë, por kur një pasuri blihet me një çmim shumë të ulët dhe rishitet brenda pak muajsh disa herë më shtrenjtë, lind dyshimi se transaksioni mund të përdoret për të futur në sistem para me burim të paqartë.
Mekanizmi është i thjeshtë, prona blihet fillimisht me një vlerë të ulët në dokumente. Më pas, e njëjta pronë shitet me një çmim shumë më të lartë.
Diferenca mes dy vlerave shfaqet në letra si fitim nga shitblerja e pronës, duke i dhënë parasë një burim formal dhe të dokumentuar.
Sipas raportit, ky nuk është një rast i izoluar. I njëjti person kishte kryer disa investime në pasuri të paluajtshme, përfshirë blerje trualli në Kavajë, përfitim prone me dhurim, blerje në zonën e Prezës dhe përfitim të sipërfaqeve të mëdha toke arë në Dajt, me çmime që varionin nga 4 deri në 21 euro për metër katror.
AIF ka evidentuar gjithashtu përdorimin e shoqërive tregtare dhe llogarive bankare në qarkullimin e fondeve. Në raport përmenden pagesa ndërmjetësimi, transferta mes shoqërive dhe përdorimi i fondeve si për aktivitet biznesi, ashtu edhe për likuidimin e kontratave të shitblerjes së pasurive të paluajtshme.
Nga verifikimet në Kadastër, në pronësi të shtetasit dhe të një prej shoqërive të lidhura me të rezultonte një numër i lartë pasurish të paluajtshme.
Ky element, i kombinuar me blerjet nën çmimin e tregut dhe rishitjet e shpejta me vlera shumëfish më të larta, ka bërë që rasti të dërgohet për investigim të mëtejshëm në organet e zbatimit të ligjit.
Tipologjia e publikuar nga AIF tregon se pasuritë e paluajtshme vijojnë të mbeten një nga kanalet më të ndjeshme për pastrimin e parave.
Në këtë rast, dyshimi nuk qëndron vetëm te blerja e tokave, por te mënyra se si çmimi i tyre rritet në letra brenda një periudhe shumë të shkurtër, duke krijuar mundësinë që para me origjinë të paqartë të paraqiten si fitime të ligjshme nga tregu imobiliar. /skyweb.al
