Sipas të dhënave nga tregu, tarifa minimale për hartimin e një raporti vlerësimi për apartamentet luhatet nga 100 deri në 150 euro, ndërsa për shtëpi private apo vila varion mesatarisht nga 150 deri në 300 euro.
Për ambiente tregtare si dyqane apo njësi komerciale, ekspertët aplikojnë zakonisht një tarifë nga 200 në 300 euro, ndërsa për bar-kafe dhe restorante kostoja mund të shkojë nga 250 deri në 500 euro, raporton TvScan.
Për magazinat tarifa mesatare vlerësohet nga 200 në 400 euro, ndërsa për hotelet raporti i vlerësimit kalon mbi 500 euro.
Në rastin e tokave bujqësore, kostoja varion nga 150 në 200 euro, ndërsa për trojet për zhvillim nga 200 në 400 euro. Megjithatë, tarifa përfundimtare mbetet e lidhur me kompleksitetin e pronës dhe dokumentacionin shoqërues.
Në rast se rivlerësimi kryhet nga një ekspert i licencuar, baza e tatueshme përcaktohet si diferenca mes vlerës së re të pasqyruar në raport dhe vlerës së zbritshme, e cila nuk mund të jetë më e ulët se çmimet e referencës.
Ndryshe nga tarifat e tregut privat, shërbimi i rivlerësimit pranë ASHK-së ka tarifa fikse në varësi të shumës së tatimit të paguar. Ato janë 3500 lekë kur tatimi 5 për qind arrin deri në 150 mijë lekë, 7000 lekë kur varion nga 150 deri në 300 mijë lekë dhe 10 mijë lekë kur kalon mbi 300 mijë lekë.
Në praktikë, zgjedhja e një eksperti privat ka kosto më të lartë, por shpesh shoqërohet me një vlerësim më të favorshëm të pronës. /skyweb.al
