I besuari i Frida Krifcës, Reni Ashiku pyetet në SPAK për fondet IPARD: Gati prangat për hajdutët e parave që BE-së për fermerët

Reni Ashiku, një nga bashkëpunëtorët më të afërt të ish-ministres së Bujqësisë Frida Krifca, u paraqit këtë të enjte në SPAK për t’u marrë në pyetje në lidhje me hetimet për abuzimin me fondet e programit IPARD.

Procedimi nisi pas kallëzimit të Zyrës Evropiane Kundër Mashtrimit (OLAF), e cila evidentoi shkelje në administrimin e fondeve të destinuara për sektorin bujqësor në Shqipëri. Sipas hetimeve paraprake, Ashiku dyshohet të ketë pasur një rol kyç në skemën e dyshuar të mashtrimit.

View this post on Instagram

A post shared by Skyweb.al (@skyweb.al)

Si pasojë e rekomandimeve të OLAF, Bashkimi Evropian vendosi të ndërpresë financimin përmes programit IPARD 3, duke bllokuar qindra miliona euro që ishin planifikuar si mbështetje për fermerët shqiptarë.

Vendimi erdhi pas dyshimeve për abuzime në Agjencinë për Zhvillim Bujqësor dhe Rural (AZHBR), për të cilat është vënë në qendër të kritikave edhe ish-ministrja Krifca.

Dosja e IPARD konsiderohet një nga çështjet më të ndjeshme që lidhen me përdorimin e fondeve të Bashkimit Evropian në Shqipëri, pasi prek drejtpërdrejt besueshmërinë institucionale dhe mbështetjen financiare për sektorin e bujqësisë. /skyweb.al