Tensionet në Lindjen e Mesme po përkthehen me shpejtësi në presion mbi tregun e energjisë dhe pritet që brenda pak ditësh të reflektohen drejtpërdrejt në çmimet e karburanteve në vend.
Sipas të dhënave të tregut dhe operatorëve të sektorit, rritja e çmimit të naftës në bursat ndërkombëtare do të sjellë një shtrenjtim të naftës në Shqipëri me rreth 15 deri në 20 lekë për litër.
Menjëherë pas përshkallëzimit të konfliktit në Lindjen e Mesme në fund të shkurtit, çmimet globale të energjisë reaguan ndjeshëm.
Nafta u rrit deri në 13 për qind, ndërsa gazi shënoi një rritje edhe më të fortë, duke reflektuar pasigurinë mbi furnizimet në një nga rajonet më të rëndësishme për prodhimin dhe transportin e energjisë.
Çmimi i naftës Brent arriti rreth 79 dollarë për fuçi, nga nivelet 62 deri 65 dollarë që luhatej përpara shpërthimit të tensioneve.
Operatorët e tregut vendas raportojnë se furnizimet e fundit janë bërë me kosto dukshëm më të larta, çka pritet të përkthehet shpejt në tregun e pakicës sipas Shoqatës së Hidrokarbureve, raporton Monitor.
Aktualisht nafta shitet rreth 170 deri në 175 lekë për litër, ndërsa parashikimet tregojnë se çmimi mund të ngjitet në intervalin 185 deri 190 lekë për litër në ditët në vijim.
Rritja e kostove të energjisë pritet të ketë ndikim zinxhir edhe në sektorë të tjerë, veçanërisht në transportin e mallrave, ku tarifat mund të rishikohen për shkak të shtrenjtimit të karburantit. Në këtë kontekst, zhvillimet në tregjet ndërkombëtare të energjisë mbeten faktori kryesor që do të përcaktojë ecurinë e çmimeve në javët në vijim. /skyweb.al
