Në tregun e punës në vend janë aktualisht rreth 6 700 vende të lira, të publikuara në portalin zyrtar puna.gov.al nga Agjencia Kombëtare e Punësimit dhe Aftësive.
Njoftimi konfirmon se ofertat përfshijnë një gamë të gjerë sektorësh dhe u drejtohen kandidatëve me nivele të ndryshme arsimimi dhe përvoje.
Sipas të dhënave të publikuara, një pjesë e konsiderueshme e vendeve të lira lidhet me profesionet ku kërkesa për fuqi punëtore mbetet e lartë.
Mes tyre janë punonjës pastrimi, punëtorë ndërtimi, ndihmës kuzhinierë, rrobaqepës, sistemues malli, prodhues këpucësh, kamarierë, shitës, shoferë të mjeteve të rënda, kuzhinierë dhe banakierë. Këto pozicione synojnë kryesisht persona me aftësi praktike dhe përvojë në terren.
Paralelisht, në portal janë të shpallura edhe vende pune që kërkojnë kualifikime të specializuara dhe arsim të lartë. Ofertat përfshijnë pozicione për ekonomistë, menaxherë, specialistë komunikimi, inxhinierë mekanikë, zhvillues softuerësh, nëpunës zyre, inxhinierë civilë, specialistë finance, drejtues në tregti dhe inxhinierë të elektroteknologjisë. Këto vende pune synojnë profesionistë me formim të avancuar dhe eksperiencë të konsoliduar.
Agjencia u bën thirrje të gjithë të interesuarve të aplikojnë përmes platformës online, duke theksuar se procesi është i thjeshtë dhe i aksesueshëm.
Për qytetarët që hasin vështirësi gjatë aplikimit, ofrohet asistencë përmes zyrave të punës në të gjithë vendin, si edhe mbështetje online për çdo paqartësi apo nevojë shtesë. /skyweb.al
