Tregu shqiptar i automjeteve po orientohet gjithnjë e më shumë drejt Azisë, me Korenë e Jugut dhe Kinën që tashmë zënë së bashku mbi 40% të mjeteve të regjistruara për herë të parë në vend.
Sipas të dhënave të Drejtorisë së Përgjithshme të Shërbimeve të Transportit Rrugor, gjatë periudhës janar-korrik 2026 janë regjistruar për herë të parë 58,444 mjete, ose 1.7% më shumë krahasuar me të njëjtën periudhë të vitit të kaluar.
Pjesën dërrmuese të tregut e përbëjnë autoveturat. Në shtatë muaj janë regjistruar 46,446 autovetura, të cilat përfaqësojnë 79.5% të numrit të përgjithshëm të mjeteve të regjistruara për herë të parë.
Por ajo që bie në sy është ndryshimi në origjinën e automjeteve që po hyjnë në tregun shqiptar.
Republika e Koresë është tashmë burimi kryesor, me 25.5% të të gjitha mjeteve të regjistruara për herë të parë. Menjëherë pas saj renditet Kina, me një pjesë prej 16.2%.
Të marra së bashku, Koreja e Jugut dhe Kina përfaqësojnë 41.7% të tregut, çka tregon peshën e konsiderueshme që kanë marrë automjetet me origjinë aziatike në Shqipëri.
Pas tyre renditen tregjet tradicionale europiane. Gjermania përfaqëson 11.9% të mjeteve të regjistruara, ndërsa Italia 11.7%.
Një tjetër burim i rëndësishëm janë Shtetet e Bashkuara të Amerikës, prej nga vijnë 8.3% e mjeteve të regjistruara për herë të parë, ndërsa Zvicra përfaqëson 6.8%.
Të dhënat tregojnë kështu një konfigurim të ri të tregut shqiptar të automjeteve, ku Gjermania dhe Italia vazhdojnë të kenë një peshë të konsiderueshme, por Koreja e Jugut dhe Kina janë kthyer në dy burimet kryesore të mjeteve që hyjnë në vend.
