Destinacioni turistik i Belshit është vlerësuar në skenën ndërkombëtare të turizmit, duke marrë çmimin “Bronze Award” nga organizata ndërkombëtare Green Destinations, një nga vlerësimet më të njohura globale për destinacionet që zhvillojnë turizëm të qëndrueshëm.
Çmimi u dha gjatë panairit ndërkombëtar të turizmit ITB Berlin, një nga ngjarjet më të mëdha të industrisë turistike në botë, ku prezantohen destinacione nga të gjitha kontinentet dhe praktikat më të mira për zhvillimin e qëndrueshëm të turizmit.
Çmimi pasqyron një njohje ndërkombëtare për potencialin turistik të Belshit dhe zonës së Dumresë, veçanërisht për përpjekjet në mbrojtjen e natyrës dhe zhvillimin e turizmit në harmoni me mjedisin.
Sipas organizatorëve, vlerësimi lidhet me disa elementë kyç të zhvillimit të zonës, mes tyre mbrojtja e pasurive natyrore dhe biodiversitetit, promovimi i turizmit të qëndrueshëm dhe nxitja e zhvillimit të ekonomisë lokale duke ruajtur ekuilibrin me mjedisin.
Liqenet e Dumresë, të konsideruara si një nga peizazhet më të veçanta natyrore në Shqipëri, po tërheqin gjithnjë e më shumë vizitorë vendas dhe të huaj, ndërsa zona po pozicionohet gradualisht në hartën ndërkombëtare të destinacioneve turistike që promovojnë natyrën dhe turizmin e qëndrueshëm.
Kryetari i Bashkisë Belsh, Arif Tafani, reagoi në rrjetet sociale duke theksuar se bashkia do të vazhdojë të mbështesë politika dhe projekte që synojnë zhvillimin e një turizmi cilësor dhe të qëndrueshëm për zonën. /skyweb.al
