Më shumë se një në tre automjete që nuk kalojnë kontrollin teknik në Shqipëri dështojnë për shkak të problemeve me sistemin e gazrave, duke treguar se ndotja dhe gjendja e dobët e motorëve dhe sistemi i shkarkimit mbetet një nga problemet më të përhapura të flotës së makinave në vend.
Sipas të dhënave të publikuara nga Drejtoria e Përgjithshme e Shërbimeve të Transportit Rrugor, gjatë dy muajve të parë të vitit 2026, në periudhën janar-shkurt, plot 16.301 automjete nuk kanë arritur të kalojnë kolaudimin.
Shifrat tregojnë se shkaku kryesor i dështimit lidhet me sistemin e shkarkimit të gazrave. Rreth 34.5 për qind e automjeteve që nuk kalojnë kontrollin teknik rezultojnë me probleme pikërisht në këtë sistem. Defektet në shkarkimin e gazrave ndikojnë drejtpërdrejt jo vetëm në funksionimin e motorit, por edhe në rritjen e ndotjes së ajrit.
Një pjesë tjetër e konsiderueshme e mjeteve rezultojnë me mangësi vizuale dhe funksionale, që përbëjnë rreth 30 për qind të rasteve të automjeteve që nuk kalojnë kontrollin teknik.
Ndërkohë rreth 20 për qind e mjeteve kanë probleme në sistemin e drejtimit dhe të amortizimit, elementë thelbësorë për stabilitetin e automjetit gjatë lëvizjes.
Po ashtu rreth 15.5 për qind e automjeteve dështojnë në kolaudim për shkak të problemeve në sistemin e frenimit, një nga komponentët më kritikë për sigurinë rrugore.
Autoritetet u bëjnë apel drejtuesve të mjeteve që të kontrollojnë rregullisht gjendjen teknike të automjeteve dhe të kryejnë mirëmbajtjen e nevojshme, pasi një automjet në gjendje të mirë teknike është një faktor kyç për sigurinë në rrugë dhe për mbrojtjen e mjedisit. /skyweb.al
