Një studim i ri shkencor ka ngritur pikëpyetje mbi besueshmërinë e inteligjencës artificiale kur përdoret për këshilla mjekësore urgjente.
Sipas një kërkimi të publikuar në revistën shkencore Nature, sistemi ChatGPT Health shpesh nuk arrin të identifikojë saktë situatat kur një pacient duhet të kërkojë ndihmë urgjente mjekësore.
Studimi tregon se ndërsa sistemi performon mirë në raste tipike dhe të qarta, ai nënvlerëson më shumë se gjysmën e rasteve që në realitet kërkojnë trajtim emergjent.
ChatGPT përdoret gjerësisht për këshilla shëndetësore. Sipas OpenAI, më shumë se 230 milionë njerëz çdo javë i drejtohen këtij sistemi për pyetje që variojnë nga siguria e ushqimeve deri tek menaxhimi i alergjive apo trajtimi i simptomave të zakonshme si ftohja.
Por studiuesit paralajmërojnë se në situata ku rreziku nuk është menjëherë i dukshëm, sistemi mund të japë rekomandime të pasakta.
Autorët e studimit krijuan 60 skenarë klinikë nga 21 specialitete të ndryshme mjekësore, duke përfshirë raste nga probleme të lehta që mund të trajtohen në shtëpi deri tek emergjenca të vërteta mjekësore. Për çdo skenar, tre mjekë të pavarur përcaktuan nivelin e duhur të urgjencës sipas udhëzimeve të 56 shoqatave mjekësore.
Rezultatet treguan se ChatGPT Health identifikon mirë emergjencat klasike, si goditja në tru apo reaksionet e rënda alergjike. Megjithatë, në disa raste më të ndërlikuara sistemi nuk rekomandoi ndihmë urgjente edhe kur rreziku ishte i lartë.
Në një nga skenarët e analizuar, sistemi arriti të dallojë shenjat e hershme të dështimit të frymëmarrjes tek një pacient me astmë, por megjithatë sugjeroi pritje në vend të një vizite urgjente në spital.
Studimi analizoi gjithashtu mënyrën se si sistemi reagon kur përdoruesit shprehin mendime për vetëdëmtim apo vetëvrasje. Edhe në këtë rast u konstatuan mospërputhje. Sistemi duhet të sugjerojë menjëherë kërkimin e ndihmës dhe kontaktimin e linjave të krizës, por gjatë testimeve ky mesazh u shfaq në mënyrë jo të qëndrueshme.
ChatGPT Health u prezantua nga OpenAI në janar të vitit 2026 dhe lejon përdoruesit të lidhin të dhënat e tyre shëndetësore, si kartelat mjekësore apo aplikacionet e mirëqenies, për të marrë përgjigje më të personalizuara.
Megjithatë, autorët e studimit nuk rekomandojnë që përdoruesit të heqin dorë nga këto mjete teknologjike. Sipas tyre, inteligjenca artificiale mund të jetë një ndihmë e dobishme në sistemin shëndetësor, por nuk duhet të zëvendësojë gjykimin klinik të mjekëve.
Ekspertët këshillojnë që në rast simptomash serioze si dhimbje gjoksi, vështirësi në frymëmarrje, reaksione të forta alergjike apo ndryshime në gjendjen mendore, pacientët duhet të kërkojnë menjëherë ndihmë mjekësore dhe të mos mbështeten vetëm tek përgjigjet e një chatboti.
Sipas studiuesve, zhvillimi i inteligjencës artificiale është i shpejtë dhe performanca e këtyre sistemeve mund të përmirësohet me përditësime të vazhdueshme, por përdorimi i tyre kërkon ende kujdes dhe mbikëqyrje profesionale. /euronews.com
