Eksperti i sigurisë kibernetike, Besmir Semanaj, ka reaguar në rrjetet sociale lidhur me pretendimet për një sulm kibernetik ndaj Kuvendit të Shqipërisë nga të ashtuquajtur “hakerë iranianë”.
Në një postim në Facebook, Semanaj vë në pikëpyetje versionin që qarkullon në rrjet për autorësinë e sulmit, duke theksuar se sipas të dhënave të monitorimit global të rrjetit nga NetBlocks, lidhja me internetin në Iran ka rënë në rreth 1 për qind, një situatë që sipas tij përbën pothuajse një ndërprerje totale të internetit në vend.
“Duket se kemi zbuluar një fenomen të ri: hakerë që punojnë edhe kur vendi i tyre është offline”, shkruan ai me ironi në reagimin e tij.
Sipas Semanajt, në të njëjtën kohë që raportohet për një shutdown pothuajse total të internetit në Iran, në rrjetin Telegram po publikohen materiale që pretendohet se janë marrë nga institucione shqiptare nga një grup i lidhur me Iranin.
Eksperti ngre dyshime mbi këtë situatë duke theksuar se Irani ndodhet në kulmin e tensioneve dhe konflikteve rajonale, ndërsa interneti në vend është pothuajse i bllokuar, por megjithatë, sipas pretendimeve që qarkullojnë, hakerët iranianë po merren me publikimin e materialeve që lidhen me Parlamentin shqiptar.
Në reagimin e tij, Semanaj thekson gjithashtu një model që sipas tij është përsëritur shpesh në Shqipëri.
“Sa herë ka një skandal të madh politik, papritur del një lajm për një hakerim spektakolar nga jashtë”, shkruan ai, duke shtuar se një situatë e tillë po ndodh edhe tani, në një moment kur politika shqiptare po përballet me çështje të ndjeshme, si votimi për imunitetin e ish-zëvendëskryeministres Belinda Balluku.
Në fund të reagimit, eksperti thekson se ndoshta mund të jetë një rastësi, por sipas tij në Shqipëri këto rastësi ndodhin shpesh, veçanërisht kur nevojitet një “armik i largët dhe misterioz” për të shpjeguar situata të caktuara. /skyweb.al
