Anulohet tenderi për ndërtimin e portit të ri tregtar në Porto Romano, pasi kompania e vetme që kishte mbetur në garë është tërhequr nga procedura. Lajmi u konfirmua nga ministri i Infrastrukturës dhe Energjisë, Enea Karakaçi, pas mbledhjes së qeverisë.
Sipas ministrit, kompania u tërhoq për arsye ekonomike, duke argumentuar se rritja e kostove të ndërtimit dhe efektet e krizës kanë ndikuar në pamundësinë për të vijuar me ofertën.
Karakaçi tha se qeveria do të punojë për një skenar tjetër që projekti i portit të Porto Romanos të mos bllokohet, duke theksuar se bëhet fjalë për një investim strategjik për zhvillimin ekonomik të vendit.
Ai shtoi se gjatë gjithë procesit të tenderimit projekti është konsultuar me kompaninë ndërkombëtare Royal Haskoning nga Holanda, një nga kompanitë më të mëdha në botë për projektet portuale, e cila ka asistuar Autoritetin Portual të Durrësit.
I pyetur për pretendimet mbi ndikime ruse në kompaninë pjesëmarrëse në garë, ministri e cilësoi këtë një aludim dhe tha se nëse do të kishte lidhje të tilla ato do të ishin evidentuar nga konsulentët ndërkombëtarë gjatë procesit të vlerësimit.
Ndërkohë, lidhur me shqetësimin e ngritur nga Dhoma Amerikane e Tregtisë në Tiranë, e cila kishte kërkuar anulimin e projektit dhe rishikimin e tij, Karakaçi tha se projekti është ideuar prej dy vitesh dhe ka kaluar të gjitha fazat proceduriale.
Sipas tij, projekti i portit të Porto Romanos është hartuar sipas standardeve ndërkombëtare dhe qeveria do të vijojë të punojë për realizimin e tij edhe pas tërheqjes së kompanisë nga tenderi. /skyweb.al
