Kryeministri Edi Rama, gjatë konferencës për shtyp këtë të premte foli per krizë e naftës si pasojë e luftës në Iran. Sipas tij, krijimi i një faktori të ri shtetëror në tregun shqiptar, do të lehtësonte barrën për qytetarët.
“Kriza po shfaqet edhe këtu si rezultat i rritjes së naftës. Unë e kam shprehur që qysh kur kemi bërë mbledhjen e parë të asamblesë qeverisëse pas zgjedhjeve, që është krijimi i një faktori të ri shtetëror në tregun e naftës, një forcë publike për të krijuar një kapacitet që të lehtësojë barrën mbi qytetarët, sikundër e lehtësoi konkurrenca që ne nxitëm duke ndryshuar komplet qasjen për fluturimet ajrore.
Shqipëria kishte aeroportin më të shtrenjtë në Europë, sot ka aeroportin më të suksesshëm të Ballkanit, me një diferencë mbresëlënëse nga aeroporti i rajonit, kur ne ishim jashtë harte fare, Beogradi. Sot nuk është më Beogradi kryeqyteti i aviacionit, por është Tirana, dhe kjo është një arritje e kësaj qeverie, me gjithë ata që na duan të vdekur, por sa më shumë të vdekur na duan, aq më shumë ne gjallërohemi.
Ne do të krijojmë faktorin publik, forcën e shtetit do ta fusim në tregun e naftës dhe do japim shembullin, si dhe në tregun e naftës gjërat do të ndryshojnë. Duke vënë në dispozicion kapacitetin e shtetit dhe garancinë e shtetit, do të jetë më e lehtë për të pasur marrëveshje me kompanitë që shpërndajnë naftën që të kenë qëndrueshmëri më afatgjatë”, deklaroi kryeministri. /skyweb.al
