Kryeministri Edi Rama deklaroi se vendimi i Kuvendit për të mos autorizuar kërkesën e Prokurorisë së Posaçme për heqjen e lirisë së deputetes Belinda Balluku është një çështje e përfunduar në planin parlamentar.
Sipas Ramës, Kuvendi shqyrtoi kërkesën e SPAK dhe vendosi të mos e miratojë atë, pasi nuk u vlerësua se ekzistonin arsye të mjaftueshme për kufizimin e lirisë së një deputeti.
Ai theksoi se një deputet është i barabartë përpara ligjit si çdo qytetar tjetër dhe mund të hetohet nëse ka arsye për hetim, por masa e arrestimit duhet të mbështetet në prova dhe në kushte konkrete që e justifikojnë një kufizim të tillë të lirisë.
Kryeministri nënvizoi se refuzimi i Kuvendit për autorizimin e arrestimit nuk pengon vijimin e hetimeve nga prokuroria. Sipas tij, Kodi i Procedurës Penale e parashikon qartë se mosdhënia e autorizimit për arrest nuk ndalon organin e akuzës të vazhdojë hetimet ose të kërkojë masa të tjera.
Rama shtoi se Balluku nuk ushtron më funksione ekzekutive dhe për këtë arsye nuk ka mundësi të ndikojë në procesin e hetimeve.
Ai reagoi edhe ndaj kritikave se ky vendim mund të ndikojë në procesin e integrimit europian të vendit, duke deklaruar se rruga e Shqipërisë drejt Bashkimit Europian nuk lidhet me këtë çështje dhe se procesi i integrimit do të vazhdojë normalisht.
