Qeveria ka hapur për konsultim publik një projektligj që synon të rrisë transparencën në tregjet financiare, duke vendosur rregulla më të forta për kompanitë që emetojnë tituj dhe operojnë në tregun e kapitalit.
Projektligji, ende në fazë diskutimi parashikon detyrime të qarta për publikimin e informacionit financiar, përfshirë raportet vjetore dhe gjashtëmujore, si dhe transparencë mbi strukturën e pronësisë, aksionerët dhe të drejtat e votimit.
Qëllimi është që investitorët dhe publiku të kenë akses në të dhëna të sakta dhe të krahasueshme mbi aktivitetin e kompanive.
Një rol kyç në zbatimin e këtij ligji do të ketë Autoriteti i Mbikëqyrjes Financiare, i cili do të pajiset me kompetenca më të gjera për monitorim, hetim dhe ndërhyrje në rast shkeljesh. Institucioni do të ketë të drejtë të vendosë masa administrative, të pezullojë tregtimin e titujve dhe të publikojë shkeljet për transparencë ndaj publikut.
Projektligji parashikon edhe sanksione të ashpra financiare, ku për shkelje të rënda gjobat mund të arrijnë deri në 10 milionë euro ose deri në 5% të xhiros vjetore të kompanive, duke synuar frenimin e praktikave abuzive dhe manipulimit të tregut.
Në relacionin shoqërues theksohet se tregu i kapitalit në Shqipëri vazhdon të mbetet i pazhvilluar dhe me nivel të ulët transparence, çka ka ndikuar në besimin e investitorëve dhe ka rritur rrezikun për keqpërdorime. Përmes këtij projektligji synohet krijimi i një kuadri më të fortë rregullator dhe rritja e besueshmërisë së tregut.
Ky hap lidhet gjithashtu me procesin e integrimit europian, pasi projektligji synon përafrimin e legjislacionit shqiptar me direktivat e Bashkimit Evropian në fushën e tregjeve financiare, duke vendosur standarde më të larta raportimi dhe kontrolli. /skyweb.al
