Europa po përballet me një presion të ri në furnizimin me gaz natyror të lëngshëm, ndërsa kriza në Lindjen e Mesme po devijon furnizimet drejt Azisë dhe po rrit çmimet në tregjet ndërkombëtare. Të dhënat tregojnë se disa anije me LNG kanë ndryshuar drejtim gjatë udhëtimit, duke u larguar nga Europa për shkak të ofertave më të larta nga blerësit aziatikë.
Situata është përkeqësuar pas goditjeve ndaj impiantit Ras Laffan në Katar, prodhuesi më i madh në botë i LNG-së, që detyroi shpalljen e forcës madhore për furnizimet drejt vendeve europiane si Italia, Belgjika dhe Polonia. Në të njëjtën kohë, tensionet në Ngushticën e Hormuzit, një pikë kyçe për rreth 20% të furnizimit global, kanë shtuar pasigurinë në treg.
Sipas të dhënave të tregut, të paktën 11 ngarkesa LNG janë devijuar nga Europa drejt Azisë, ndërsa çmimet globale janë rritur ndjeshëm. Çmimi referencë europian TTF ka arritur deri mbi 60 euro për megavat/orë, duke reflektuar presionin e ofertës së kufizuar dhe konkurrencën në rritje.
Azia po paguan aktualisht më shumë për LNG krahasuar me Europën, duke krijuar një diferencë që po orienton tregtarët të ridrejtojnë furnizimet drejt lindjes.
Edhe një diferencë e vogël në çmim po rezulton vendimtare në një treg të tensionuar dhe me oferta të kufizuara.
Italia, Belgjika dhe Polonia po kërkojnë alternativa për të mbuluar mungesat, ndërsa furnizimet nga SHBA, Nigeria dhe burime të tjera po konsiderohen si zgjidhje afatshkurtra.
Ndërkohë, për disa vende, varësia nga Katari mbetet e lartë, duke rritur rrezikun për furnizimin energjetik në muajt në vijim.
Kriza vjen në një moment kritik për Europën, që po hyn në sezonin e mbushjes së rezervave për dimrin e ardhshëm. Ekspertët paralajmërojnë se nëse niveli i rezervave nuk arrin në kuota të mjaftueshme, kontinenti mund të përballet me vështirësi serioze në furnizim gjatë dimrit.
Në këtë klimë pasigurie, edhe Shtetet e Bashkuara kanë shtuar presionin ndaj Bashkimit Europian, duke paralajmëruar se mund të ndryshojnë kushtet e furnizimit me LNG nëse nuk arrihet marrëveshja tregtare mes palëve. Kjo shton një dimension të ri gjeopolitik në krizën energjetike që po thellohet. /skyweb.al
