Në kundërshtim me bindjen e përhapur se zemra e njeriut nuk mund të rigjenerohet, studime të reja tregojnë se ajo ka një aftësi të kufizuar vetëripërtëritjeje pas një infarkti.
Një ekip studiuesish nga Universiteti i Sidnejt ka zbuluar se qelizat e muskulit të zemrës fillojnë të shumohen pas një dëmtimi të tillë. Megjithatë, ky proces nuk është i mjaftueshëm për të parandaluar plotësisht formimin e indeve mbresë, të cilat ulin efikasitetin e funksionimit të zemrës.
Ky zbulim, i publikuar në revistën shkencore Circulation Research, hap perspektiva të reja për zhvillimin e terapive rigjeneruese kundër sëmundjeve kardiovaskulare, të cilat mbeten shkaku kryesor i vdekjeve në mbarë botën.
Studiuesit, nën drejtimin e Robert Hume, arritën për herë të parë të analizojnë mostra të gjalla të indit të zemrës njerëzore, të marra nga pacientë që i nënshtroheshin operacionit të bajpasit koronar – një ndërhyrje që synon rikthimin e qarkullimit të gjakut duke anashkaluar arteriet e bllokuara.
Përmes këtyre mostrave, shkencëtarët analizuan molekulat e ARN-së, të cilat bartin udhëzimet për prodhimin e proteinave të koduara në ADN, duke studiuar në detaje metabolizmin e indit kardiak.
Rezultatet treguan se pas një infarkti rritet ndarja dhe përhapja e qelizave të muskulit të zemrës – një dukuri që deri më tani ishte vërejtur vetëm tek minjtë.
“Edhe pse ky zbulim mbi rigjenerimin e qelizave muskulore të zemrës është shumë premtues,” shprehet Hume, “ai ende nuk mjafton për të shmangur pasojat e rënda të një ataku kardiak. Synimi ynë është që në të ardhmen të zhvillojmë terapi që forcojnë aftësinë natyrore të zemrës për të krijuar qeliza të reja dhe për t’u rigjeneruar.”
