Skënder Hita është emëruar në krye të Policisë së Shtetit për një mandat 5-vjeçar, duke u konsideruar një nga drejtuesit më me përvojë në radhët e uniformave blu.
Hita është pjesë e Policisë së Shtetit që prej vitit 2001, pasi përfundoi Akademinë e Policisë “Arben Zylyftari”, dhe gjatë karrierës së tij ka ndjekur një sërë trajnimesh dhe programesh ndërkombëtare, të mbështetura nga USAID, Bashkimi Europian dhe agjenci ligjzbatuese në vende si Turqia dhe Britania e Madhe.
Në vitin 2011 ai u vlerësua për menaxhimin e vendit të ngjarjes nga Departamenti i Drejtësisë dhe FBI në SHBA, ndërsa në vitin 2019 mori çmim në Budapest për hetimet kundër trafikimit të armëve të zjarrit.
Në vitin 2022, Hita përfundoi me rezultate të larta programin për ngritjen në detyrë, duke marrë gradën “Drejtues i Parë”, ndërsa së fundmi ka ndjekur programin “EU Business Law” në Fakultetin e Drejtësisë në Universitetin e Tiranës gjatë viteve 2023–2024.
Karriera e tij në Policinë e Shtetit përfshin një sërë rolesh drejtuese në disa qarqe të vendit. Ai e ka nisur si inspektor krimesh në komisariate të Tiranës, për t’u ngjitur më pas në detyra të ndryshme drejtuese në strukturat e luftës kundër krimit të organizuar dhe krimit financiar.
Në vitin 2013 mbajti detyrën e shefit të njësisë në Forcën e Posaçme Operacionale, ndërsa në vitin 2015 u emërua zv/drejtor për krimet në Policinë e Qarkut Fier. Më pas ka ushtruar këtë funksion edhe në qarqet Lezhë, Elbasan, Tiranë, Gjirokastër dhe Shkodër.
Në vitin 2021 ai u emërua drejtor i Policisë së Shkodrës, ndërsa në vitin 2022 mori drejtimin e Policisë së Dibrës. Pas rreth dy vitesh në këtë detyrë, Hita u transferua në krye të Policisë së Durrësit.
Gjatë drejtimit të strukturave në Durrës janë zbardhur disa ngjarje të rënda kriminale, përfshirë rastin e vëllezërve Indrit dhe Gentjan Beqiraj, dëshmia e të cilëve ndihmoi në hetimin e disa krimeve në disa qytete të vendit, si dhe vrasjen e Pëllumb Metës në Shënvlash.
Që nga nëntori i vitit 2024, Skënder Hita mbante detyrën e drejtorit të Policisë së Qarkut Fier, ndërsa më herët ai ishte përmendur edhe si një nga kandidatët kryesorë për postin e Drejtorit të Përgjithshëm të Policisë së Shtetit.
Emërimi i tij në krye të Policisë së Shtetit vjen në një moment kur struktura e rendit përballet me sfida të forta në luftën kundër krimit të organizuar dhe rritjen e standardeve të sigurisë në vend. /skyweb.al
