Qytetarët duhet të tregojnë kujdes të shtuar ndaj mesazheve mashtruese që mund të marrin në telefonat celularë. Drejtoria për Hetimin e Krimeve Kibernetike pranë Policisë së Shtetit njofton se janë në qarkullim SMS të rreme, të cilat paraqiten si njoftime nga shërbimet postare për dorëzimin e pakove.
Këto mesazhe përmbajnë lidhje të dyshimta dhe nxisin marrësit të veprojnë menjëherë. Qëllimi i tyre është të përvetësojnë të dhëna personale, të vjedhin informacione bankare dhe të sigurojnë akses të paautorizuar në llogari financiare.
Autoritetet theksojnë se bëhet fjalë për tentativa mashtrimi dhe u bëjnë thirrje qytetarëve të jenë maksimalisht të kujdesshëm. Konkretisht, rekomandohet që të mos klikohen lidhje të dërguara nga numra të panjohur, të mos ndahen të dhëna personale apo bankare dhe të mos ndiqen udhëzime që kërkojnë veprim të menjëhershëm pa u verifikuar më parë.
Po ashtu, këshillohet fshirja e menjëhershme e këtyre mesazheve, shmangia e çdo ndërveprimi me to dhe raportimi i rasteve të dyshimta në kontaktet zyrtare. Drejtoria për Hetimin e Krimeve Kibernetike vijon angazhimin për identifikimin dhe goditjen e këtyre skemave, duke synuar rritjen e sigurisë digjitale për të gjithë qytetarët. /skyweb.al
