Aeroporti i Brindisit në Itali ka mbetur pa karburant për avionët, duke krijuar një situatë të pazakontë që po ndikon në operacionet ajrore në disa aeroporte të vendit.
Problemi është evidentuar përmes njoftimeve zyrtare aeronautike, ku paralajmërohen kufizime dhe vështirësi në furnizim.
Sipas të dhënave, aeroporti i Brindisit rezulton plotësisht pa karburant të paktën deri më 7 prill, ndërsa disa aeroporte të tjera italiane po operojnë me rezerva të kufizuara. Mes tyre përfshihen Milano Linate, Venecia, Treviso, Bolonja, si dhe aeroportet e Reggio Calabria dhe Pescara.
Ndërkohë, edhe aeroporte të tjera në Itali kanë lëshuar njoftime për ndërprerje apo kufizime në furnizimin me karburant për avionët, duke sinjalizuar një problem më të gjerë në zinxhirin e furnizimit.
Autoritetet u kanë kërkuar kompanive ajrore që të marrin masa paraprake duke furnizuar avionët me sasi të mjaftueshme karburanti që në aeroportet e nisjes, për të shmangur varësinë nga furnizimi në Brindisi apo në aeroporte të tjera me kufizime./skyweb.al
