Kryeministri Edi Rama ka prezantuar një ide të re për pensionet, duke folur për një skemë që në thelb lidhet me shtyllën e tretë, por me një mekanizëm të ndryshuar nga modeli klasik.
Gjatë takimeve në Lezhë dhe Durrës, Rama shpjegoi se po punohet për një fond shtesë pensioni, ku qytetarët mund të zgjedhin të kontribuojnë vullnetarisht nga paga e tyre çdo muaj. Risia qëndron në faktin se kjo shumë nuk do të jetë vetëm individuale, pasi do të shoqërohet me një kontribut të barabartë nga shteti ose punëdhënësi.
Sipas shembullit të dhënë nga kryeministri, nëse një individ vendos të kursejë 1 euro në muaj, shteti do të shtojë edhe 1 euro tjetër, duke e çuar kontributin total në 2 euro. Kjo skemë synon të ndërtojë gradualisht një fond të garantuar, që do të shtohet mbi pensionin bazë që përfitohet nga sigurimet shoqërore.
Në thelb, kjo është ajo që njihet si shtylla e tretë e pensioneve, një model kursimi vullnetar që prej vitesh është propozuar nga ekspertët e fushës dhe nga tregu i sigurimeve si një zgjidhje për të rritur të ardhurat në pleqëri dhe për të lehtësuar presionin mbi skemën shtetërore.
Megjithatë, propozimi i Ramës ndryshon nga modeli klasik i shtyllës së tretë. Në variantin tradicional, individi kursen vetë një shumë mujore, e cila investohet dhe i kthehet në pension. Ndërsa në modelin e ri të propozuar, kursimi shoqërohet me një kontribut shtesë nga shteti ose sektori privat, duke e bërë skemën më tërheqëse dhe potencialisht më efektive.
Kjo qasje synon të nxisë më shumë qytetarë të marrin pjesë në skema vullnetare pensioni, në një kohë kur sfidat e sistemit aktual mbeten të mëdha, për shkak të plakjes së popullsisë dhe raportit në rënie mes kontribuuesve dhe pensionistëve.
Skema është ende në fazë përgatitore dhe mbetet për t’u parë se si do të strukturohet në praktikë dhe çfarë garancish do të ofrojë për qytetarët. /skyweb.al
