Muaji mars i fundit rezulton të ketë qenë i dyti më i ngrohtë i regjistruar ndonjëherë në Evropë, sipas të dhënave të publikuara nga Shërbimi i Kopernikut për Ndryshimet Klimatike.
Raporti thekson se edhe temperaturat globale të sipërfaqes së detit arritën nivelin e dytë më të lartë për këtë muaj. Në shkallë botërore, marsi renditet i katërti më i ngrohtë që nga fillimi i matjeve, me një temperaturë mesatare prej 13,94°C. Kjo është 1,48°C mbi nivelin e periudhës para-industriale (1850–1900) dhe 0,53°C më e lartë se mesatarja e marsit për vitet 1991–2020.
Sipas raportit, prirja e temperaturave ekstreme po vazhdon, ndërsa marsi më i ngrohtë i regjistruar deri tani mbetet ai i vitit 2024.
Në Evropë, ngrohja ishte veçanërisht e theksuar, me një temperaturë mesatare prej 5,88°C, që është 2,27°C mbi mesataren e viteve 1991–2020. Pjesa më e madhe e kontinentit përjetoi kushte më të thata se zakonisht, megjithatë reshje intensive shkaktuan përmbytje në disa zona të Mesdheut dhe Skandinavisë.
Në Arktik u regjistrua niveli më i ulët i sipërfaqes së akullit detar për muajin mars, rreth 5,7% nën mesataren. Ndërkohë, temperatura mesatare globale e sipërfaqes së detit arriti në 20,97°C, duke u renditur si e dyta më e lartë e regjistruar për këtë periudhë.
Kushtet klimatike ndryshuan ndjeshëm nga një rajon në tjetrin: pjesa perëndimore e SHBA-ve përjetoi një valë të zgjatur të të nxehtit, ndërsa Alaska, Kanadaja dhe Siberia veriperëndimore u përballën me temperatura jashtëzakonisht të ulëta.
Drejtori i Shërbimit të Kopernikut për Ndryshimet Klimatike të BE-së, Carlo Buontempo, theksoi se këto të dhëna tregojnë një sistem klimatik që po përballet me presion gjithnjë në rritje.
Ky shërbim publikon në mënyrë të rregullt analiza mbi temperaturat globale, akullin detar dhe reshjet, duke u bazuar në miliarda matje të mbledhura nga satelitë, anije, avionë dhe stacione meteorologjike në mbarë botën.
