Myzeqeja vijon të mbetet një nga zonat më të rëndësishme bujqësore në vend, ku prodhimi dhe investimet po rriten falë punës së fermerëve dhe mbështetjes së qeverisë. Ky ishte mesazhi kryesor nga takimi i zhvilluar në Krutje të Lushnjës, ku të pranishëm ishin kryeministri Edi Rama, drejtuesja politike e PS për Fierin Belinda Balluku, ministri i Bujqësisë Andis Salla dhe ministri i Financave Petrit Malaj.
Gjatë bashkëbisedimit me fermerët, u theksua se zhvillimi i bujqësisë në këtë zonë lidhet drejtpërdrejt me investimet dhe politikat mbështetëse të viteve të fundit, ndërsa Myzeqeja konsiderohet një nga bazat kryesore të prodhimit bujqësor në Shqipëri.
Balluku solli si shembull një model bashkëpunimi mes fermerëve, duke përmendur rastin e Erion Bufasit dhe Afrim Çelës, të cilët kanë bashkuar aktivitetin e tyre bujqësor. Nga një sipërfaqe prej vetëm 2 dynymësh në fillim, aktiviteti është zgjeruar në rreth 5 hektarë, duke krijuar një fermë të qëndrueshme.
Ajo theksoi se fermerët kanë përfituar nga skemat e mbështetjes ndër vite, duke përfshirë edhe programin për mbrojtjen biologjike, i cili mbulohet deri në 70% nga fondet e qeverisë.
Në të njëjtën linjë, Rama u ndal te nevoja për bashkimin e fermerëve si mënyrë për të rritur fitimet dhe për të përmirësuar pozicionin në treg. Sipas tij, bashkëpunimi në shitje dhe organizim rrit ndjeshëm të ardhurat dhe fuqinë negociuese.
“Vetëm duke u bashkuar secili fiton 30% më shumë, është llogari e bërë. Secili ka tokën e vet, por kur del në treg bashkë krijon masë dhe garanci,” u shpreh ai.
Nga ana e tij, ministri i Bujqësisë Andis Salla deklaroi se prioritet mbetet ulja e kostove për fermerët dhe rritja e prodhimit përmes investimeve në sera, përpunim dhe kultura të ndryshme bujqësore, me synimin për të rritur të ardhurat dhe qëndrueshmërinë e fermave.
Ndërkohë, ministri i Financave Petrit Malaj theksoi se buxheti për bujqësinë është rritur ndjeshëm gjatë viteve të fundit, duke kaluar nga 34 milionë euro në rreth 160 milionë euro, çka sipas tij reflekton angazhimin për këtë sektor.
Takimi në Myzeqe vjen në një moment kur qeveria synon të forcojë më tej mbështetjen për bujqësinë, duke nxitur bashkëpunimin mes fermerëve dhe orientimin drejt standardeve të tregut europian.
