Kryeministri Edi Rama ka reaguar pas zjarrit që përfshiu një pallat në Tiranë, duke garantuar se godina do të rindërtohet plotësisht nga vetë ndërtuesi, pa kosto për qytetarët apo taksapaguesit.
Në një deklaratë në rrjetin social X, Rama theksoi se, megjithëse të dhënat paraprake tregojnë se shkaku i zjarrit nuk lidhet me cilësinë e ndërtimit, familjet e dëmtuara nuk do të lihen vetëm përballë pasojave.
Sipas tij, rindërtimi do të mbulohet 100% nga ndërtuesi, ndërsa përjashtohet mundësia që dëmi të rëndojë mbi buxhetin e shtetit.
Kryeministri nënvizoi se në raste të tilla përgjegjësia duhet të mbulohet nga sigurimet, duke e cilësuar ngjarjen si një shembull të qartë për rëndësinë e sigurimit të banesave nga fatkeqësitë.
“Pallati që u dogj dje në Tiranë do të rindërtohet 100% nga vetë ndërtuesi, pavarësisht se nga të dhënat paraprake shkaku i zjarrit s’ka asnjë lidhje me vetë ndërtimin.
Ne nuk mund t’i lemë vetëm njerëzit e dëmtuar dhe taksapaguesit nuk mund të paguajnë një dëm që duhet ta mbulojnë sigurimet”, shkroi Rama.
Ai siguroi banorët e prekur se duhet të ndihen të qetë për këtë aspekt, ndërsa falënderoi zjarrfikësit dhe forcat e rendit për ndërhyrjen, duke theksuar se puna e tyre bëri të mundur shpëtimin e jetëve të rrezikuara. /skyweb.al
