Reni Ashiku është paraqitur për herë të dytë në ambientet e Prokurorisë së Posaçme, në kuadër të hetimeve për fondet IPARD, duke rikthyer në vëmendje një nga dosjet më të ndjeshme të financimeve në bujqësi.
Ai konsiderohet si një nga personat kyç në këtë çështje, për shkak të rolit të tij në procesin e aplikimeve dhe ndërmjetësimit për përfitimin e granteve.
Ashiku është administrator i kompanisë “Converse Management Consulting (CMC)”, një firmë konsulence e krijuar në vitin 2018, e fokusuar në përgatitjen e projekteve për fermerë dhe biznese që synonin të përfitonin fonde nga skema IPARD e Bashkimit Europian.
Hetimet e nisura lidhen me mënyrën e menaxhimit dhe shpërndarjes së këtyre fondeve, ndërsa dyshimet përfshijnë edhe rolin e kompanive konsulente në procesin e përzgjedhjes së përfituesve. Sipas të dhënave paraprake, struktura të tilla dyshohet se kanë funksionuar si ndërmjetës, duke ndikuar në përfitimin e granteve në këmbim të përqindjeve.
Në këtë çështje është kallëzuar edhe ish-ministrja e Bujqësisë, Frida Krifca, ndërsa Ashiku përmendet si një person i afërt me të dhe pjesë e zinxhirit që lidhet me aplikimet dhe financimet në kuadër të IPARD.
Programi IPARD është një instrument financiar i Bashkimit Europian për mbështetjen e bujqësisë dhe zhvillimit rural, por në rastin e Shqipërisë është përfshirë në një skandal të gjerë, ku dyshohet për keqmenaxhim dhe abuzim me miliona euro fonde.
Deri më tani nuk janë bërë publike detaje të plota mbi rolin konkret të secilit prej personave të përfshirë, ndërsa hetimet nga SPAK vijojnë dhe pritet të hedhin më shumë dritë mbi skemën e dyshuar./skyweb.al
