Ngushtica strategjike e Hormuzit po rikthehet gradualisht në funksion normal, pasi Irani dhe Shtetet e Bashkuara konfirmuan se rruga detare do të jetë plotësisht e hapur për trafikun tregtar gjatë periudhës së armëpushimit.
Zhvillimi vjen pas gati dy muajsh bllokadë pothuajse totale, që nga nisja e konfliktit më 28 shkurt, një situatë që paralizoi një nga arteriet më të rëndësishme të tregtisë globale, përmes së cilës kalon rreth një e pesta e furnizimeve botërore me naftë dhe gaz të lëngshëm.
Sinjalet e para konkrete të rihapjes janë reflektuar menjëherë në terren. Anija me flamur maltez “Celestyal Discovery”, e cila kishte qëndruar e bllokuar për 47 ditë në portin e Dubait, është nisur drejt Omanit dhe ka kaluar me sukses Ngushticën e Hormuzit, sipas të dhënave të gjurmimit detar. Anija, që udhëtonte vetëm me ekuipazh, pritet të mbërrijë në destinacion brenda ditës së shtunë.
Në të njëjtën kohë, edhe anije të tjera turistike që ishin bllokuar në portet e Gjirit Persik kanë nisur lëvizjen. Dy kroçera të ndodhura në Doha, njëra prej tyre në pronësi të kompanisë gjermane TUI, si dhe një tjetër në Abu Dhabi, janë përgatitur për nisje ose kanë lënë tashmë portet, duke konfirmuar rifillimin e qarkullimit detar.
Të dhënat nga aplikacionet e monitorimit detar tregojnë se edhe anije të tjera janë vënë në lëvizje, përfshirë “Celestyal Journey”, që u largua nga porti i Dohas, në një valë të parë trafiku që po kalon përmes ngushticës pas njoftimit për rihapjen.
Vendimi për rihapjen e plotë të korridorit detar lidhet me armëpushimin dyjavor mes SHBA-së dhe Iranit, i cili pritet të zgjasë deri më 22 prill. Megjithatë, presidenti amerikan Donald Trump ka sinjalizuar se mund të ketë një zgjatje të tij, nëse progresi në negociata vijon në drejtimin aktual.
Situata mbetet megjithatë e ndjeshme. Shtetet e Bashkuara kanë vendosur paralelisht një bllokadë detare ndaj porteve iraniane, ndërsa Trump ka paralajmëruar se çdo anije që do të tentojë ta thyejë atë mund të përballet me ndërhyrje ushtarake.
Pas një periudhe të gjatë pasigurie dhe tensioni që tronditi tregjet globale të energjisë dhe transportit, rifillimi i trafikut në Ngushticën e Hormuzit përbën zhvillimin e parë konkret drejt normalizimit, por mbetet i varur nga qëndrueshmëria e armëpushimit dhe ecuria e negociatave në vijim. /skyweb.al
