Frutat mbeten një nga elementët kryesorë të një diete të shëndetshme, por mënyra se si konsumohen ka ndikim të drejtpërdrejtë në shëndet. Një studim i ri ka nxjerrë në pah se konsumimi i frutave në formë lëngu mund të jetë dukshëm më pak i dobishëm krahasuar me konsumimin e tyre të plotë.
Në një kohë kur sëmundjet jo të transmetueshme dhe obeziteti janë në rritje globale, ekspertët po fokusohen gjithnjë e më shumë te faktorët e stilit të jetesës, veçanërisht dieta. Organizata Botërore e Shëndetësisë rekomandon që çdo person mbi 10 vjeç të konsumojë të paktën 400 gram fruta dhe perime në ditë.
Studimi i publikuar në revistën “Frontiers in Nutrition”, që analizoi mbi 400 persona, i ndau pjesëmarrësit në katër grupe: ata që konsumojnë pak fruta, ata që pijnë lëngje frutash, ata që konsumojnë smoothie dhe ata që hanë fruta të plota.
Rezultatet tregojnë se grupi me konsumin më të ulët të frutave kishte gjendjen më të dobët shëndetësore, ndërsa menjëherë pas tij renditen konsumuesit e lëngjeve të frutave. Këta të fundit rezultuan me nivelet më të larta të kolesterolit dhe diabetit, ndërsa ata që hanin pak fruta kishin më shumë raste të hipertensionit dhe sëmundjeve kardiovaskulare.
Në të njëjtën linjë, indeksi i masës trupore ishte më i lartë te konsumuesit e lëngjeve dhe te ata që hanin pak fruta, krahasuar me ata që preferonin fruta të plota apo smoothie.
Studimi evidenton gjithashtu ndikim edhe në shëndetin mendor. Personat që konsumonin pak fruta ose që preferonin lëngjet raportuan më shumë probleme psikologjike gjatë vitit të fundit, ndërsa grupet që konsumonin fruta të plota dhe smoothie kishin rezultate më të mira.
Një tjetër gjetje lidhet me energjinë dhe gjumin. Konsumuesit e lëngjeve raportuan nivelet më të ulëta të energjisë dhe cilësinë më të dobët të gjumit, çka sipas studiuesve lidhet me faktin se lëngjet japin më pak ndjesi ngopjeje dhe energji krahasuar me format e tjera.
Diferenca kryesore qëndron te përpunimi. Frutat e plota përmbajnë fibra, antioksidantë dhe lëndë ushqyese që ndihmojnë tretjen, forcojnë sistemin imunitar dhe mbrojnë nga sëmundjet kronike. Këto elemente humbasin pjesërisht gjatë përpunimit në lëng.
Ndërsa smoothie-t ruajnë një pjesë të mirë të fibrave dhe mund të rrisin përthithjen e disa vitaminave, si vitamina C dhe folati, duke u konsideruar më të shëndetshme se lëngjet.
Ekspertët theksojnë se përveç mënyrës së konsumimit, rëndësi ka edhe sasia. Shërbimi Kombëtar Shëndetësor në Mbretërinë e Bashkuar rekomandon që lëngjet e frutave të mos kalojnë 150 ml në ditë.
Në përfundim, studimi nënvizon se jo vetëm sasia, por edhe forma e konsumimit të frutave është vendimtare për shëndetin, duke favorizuar qartë konsumimin e tyre në formë të plotë. /euronews.com
