Fatura e udhëtimeve zyrtare jashtë vendit ka kapur shifra të reja gjatë vitit 2025. Të dhënat e fundit nga Agjencia e Prokurimit Publik (APP) konfirmojnë se institucionet shtetërore shpenzuan rreth 377.6 milionë lekë për bileta avioni, duke shënuar një rritje prej 8.6% brenda një viti.
Sipas Monitor, në vitin 2024 shteti shpenzoi 347.5 milionë lekë për këtë zë, por viti pasardhës ka pasur një intensifikim të lëvizjeve. Kjo rritje nuk është reflektuar vetëm në vlerën monetare, por edhe në numrin e procedurave të hapura, të cilat arritën në 3,134, me një rritje prej gati 10% krahasuar me vitin paraprak.
Sistemi dinamik i blerjeve mbetet porta kryesore nga ku kalojnë këto para. Edhe pse në “detin” e prokurimeve publike kjo shifër zë vetëm 0.3% të fondit total, në aspektin e punës administrative volumi është i madh. Biletat ajrore përbëjnë 14.5% të të gjitha procedurave që mbyllen me një fitues në rang vendi.
Por, përtej shifrave të rritjes, raporti nxjerr zbuluar paaftësinë administrative në hartimin e tenderave. Gjatë 2025-s dështuan 286 procedura për blerje biletash. Arsyet janë thuajse banale: 41% e tyre u anuluan për shkak të gabimeve të vetë nëpunësve në dokumentacion, ndërsa 36% dështuan sepse kompanitë ajrore nuk treguan interes për ofertat e shtetit. Pjesa tjetër e anulimeve lidhet me ankesat e operatorëve ose ndryshimet e axhendave në minutën e fundit.
Interesant është fakti se, ndërsa shpenzimet për udhëtime “në ajër” po rriten, blerjet e vogla në total kanë pësuar rënie. Nga 12,450 procedura me fitues që u regjistruan në këtë kategori, trendi flet për një ulje të tyre, duke lënë fluturimet ndërkombëtare si një nga të paktat zëra që vijon të fryhet në kurriz të buxhetit. /skyweb.al
