Çmimet e disa barnave të përdorura gjerësisht në Angli, si paracetamoli dhe ilaçet kundër alergjive, janë rritur ndjeshëm, sipas farmacistëve, për shkak të ndikimeve ekonomike të lidhura me tensionet në Iran.
Shoqata Kombëtare e Farmacive raporton se çmimi i paracetamolit është rritur me rreth 20–30% që nga shkurti. Në të njëjtën kohë, edhe barna të tjera, si cetirizina për alergjitë sezonale, kanë pësuar rritje të ngjashme.
Farmacistët theksojnë se rritja e çmimeve të karburantit dhe kostove të transportit , të nxitura nga konflikti kanë goditur drejtpërdrejt zinxhirin e furnizimit me barna në Mbretërinë e Bashkuar. Në disa raste, kostot e furnizimit për farmacitë janë rritur deri në 40–50%.
Po ashtu, transporti ajror është bërë dukshëm më i shtrenjtë, madje në disa raste kostot janë dyfishuar, duke vështirësuar furnizimin e barnave për sistemin shëndetësor publik në Angli.
Shoqata e Farmacive Komunitare paralajmëron se disa farmaci kanë përjetuar mungesa të përkohshme të barnave si aspirina dhe co-codamol. Madje, disa prej tyre kanë ndaluar përkohësisht shitjen e aspirinës pa recetë.
Ekspertët paralajmërojnë se nëse tensionet në Ngushticën e Hormuzit vazhdojnë dhe problemet në zinxhirët e furnizimit nuk zgjidhen, situata mund të përkeqësohet, me rritje të mëtejshme çmimesh dhe mungesa më serioze të barnave.
Sipas farmacistëve, kjo gjendje po rrit presionin mbi sistemin shëndetësor britanik dhe po shton kostot e barnave për shërbimin publik. /skyweb.al
