Sektori i aviacionit në Europë po përballet me një valë të re tronditjeje për shkak të rritjes drastike të çmimeve të karburantit ajror, e lidhur drejtpërdrejt me tensionet në Lindjen e Mesme.
Kompanitë ajrore kanë nisur të shkurtojnë oraret e fluturimeve dhe të transferojnë kostot tek udhëtarët, pikërisht në prag të sezonit veror.
Sipas International Air Transport Association (IATA), çmimet e karburantit për avionë në Europë janë rritur me 105.7% krahasuar me një vit më parë, duke vënë në pikëpyetje planet e udhëtimeve për verën.
Kjo situatë ka detyruar disa nga kompanitë më të mëdha ajrore të ndërmarrin masa drastike. Transavia, pjesë e grupit Air France-KLM, ka nisur anulimin e një pjese të fluturimeve për muajt maj dhe qershor.
Pasagjerëve të prekur po u ofrohet rimbursim i plotë, kupon ose rirezervim falas.
Në të njëjtën linjë, KLM ka konfirmuar anulimin e rreth 160 fluturimeve nga dhe drejt aeroportit Schiphol në maj, duke argumentuar se kostot e larta të karburantit i kanë bërë këto linja financiarisht të paqëndrueshme.
Edhe Turkish Airlines po redukton ndjeshëm operacionet, duke pezulluar 18 linja ndërkombëtare dhe duke ulur frekuencat në shumë destinacione në Europë, Afrikë dhe Azi.
Ndër destinacionet e prekura përfshihen qytete si Hurghada, Leipzig, Havana dhe Luanda, ndërsa disa linja janë hequr plotësisht nga programi i vitit 2027.
Ndërkohë, kompania SunExpress, një bashkëpunim mes Turkish Airlines dhe Lufthansa, ka vendosur një tarifë shtesë prej 10 euro për çdo pasagjer në fluturimet nga Turqia drejt Europës, duke e justifikuar si “tarifë e përkohshme karburanti”.
Vetë Lufthansa ka njoftuar më herët anulimin e rreth 20 mijë fluturimeve për të përballuar kostot në rritje, duke sinjalizuar përmasat e krizës që po prek industrinë.
Megjithatë, jo të gjitha lajmet janë negative për udhëtarët.
Grupi turistik TUI ka deklaruar se nuk do të rrisë çmimet për klientët që kanë rezervuar tashmë pushimet, duke garantuar se nuk do të aplikohen tarifa shtesë për karburantin në këto raste.
Në tërësi, zhvillimet e fundit tregojnë se kriza e karburantit po përkthehet drejtpërdrejt në më pak fluturime dhe kosto më të larta për pasagjerët, duke e bërë sezonin veror më të pasigurt se zakonisht për tregun e udhëtimeve ajrore. /skyweb.al
