Kompania ajrore amerikane me kosto të ulët, Spirit Airlines, ka ndërprerë të gjitha operacionet, duke u bërë viktima e parë e drejtpërdrejtë në industrinë e aviacionit si pasojë e rritjes së fortë të çmimeve të karburantit gjatë luftës me Iranin.
Vendimi erdhi pasi kompania nuk arriti të sigurojë mbështetjen e kreditorëve për një plan shpëtimi të propozuar nga qeveria amerikane, që parashikonte një financim prej 500 milionë dollarësh.
Në një deklaratë zyrtare, kompania njoftoi një “mbyllje të rregullt të operacioneve”, duke theksuar se rritja e ndjeshme e çmimeve të naftës dhe presionet e tjera financiare kanë dëmtuar rëndë perspektivën e saj ekonomike.
Të gjitha fluturimet janë anuluar dhe pasagjerëve u është kërkuar të mos paraqiten në aeroport. Vetëm për periudhën 1 deri më 15 maj, Spirit kishte planifikuar mbi 4,100 fluturime brenda SHBA-së, me më shumë se 800 mijë vende në dispozicion.
Falimentimi i kompanisë pritet të ketë pasoja të mëdha në treg, përfshirë humbjen e mijëra vendeve të punës. Spirit kishte arritur më herët të mbante çmime të ulëta në tregjet ku operonte, duke ushtruar presion konkurrues ndaj kompanive të mëdha ajrore.
Rritja e çmimeve të karburantit, e lidhur me tensionet në Lindjen e Mesme dhe ndërprerjet në trafikun përmes Ngushticës së Hormuzit, ka goditur rëndë industrinë. Çmimi i karburantit për avionë, që kompania kishte parashikuar rreth 2.24 dollarë për gallon në vitin 2026, arriti në rreth 4.51 dollarë në fund të prillit, duke e bërë të pamundur mbijetesën pa financim të ri.
Spirit kishte qenë tashmë në vështirësi financiare edhe para krizës së fundit, duke luftuar për të rikuperuar kërkesën pas pandemisë, në një kohë kur udhëtarët po orientoheshin më shumë drejt komoditetit sesa çmimeve të ulëta.
Mbyllja e operacioneve të saj pritet të favorizojë konkurrentët si JetBlue dhe Frontier, të cilët kanë reaguar menjëherë duke ofruar tarifa të reduktuara dhe duke shtuar kapacitetet në treg.
Rasti i Spirit Airlines shihet si një sinjal alarmi për kompanitë më të dobëta ajrore, të cilat janë më të ekspozuara ndaj goditjeve të forta nga rritja e kostove të karburantit dhe pasiguritë gjeopolitike. /skyweb.al
