Kompania low-cost Ryanair po shkon drejt një vendimi për mbylljen e bazës së saj në Selanik nga fundi i sezonit veror, një zhvillim që ka ngritur shqetësim të madh te autoritetet lokale dhe industria e turizmit.
Mediat greker raportojnë se drejtuesit e kompanisë kanë informuar stafin për mundësinë e mbylljes së bazës në aeroportin “Makedonia”, ndërsa shkak kryesor përmendet rritja e tarifave aeroportuale. Megjithatë, deri më tani nuk ka një konfirmim zyrtar publik nga kompania.
Vendimi shihet si një goditje e mundshme për Selanikun, pasi Ryanair operon një numër të lartë fluturimesh dhe ka një rol të rëndësishëm në lidhjen e qytetit me destinacione të ndryshme europiane.
Për këtë arsye, autoritetet vendore, bashkitë përreth dhe përfaqësues të sektorit të turizmit kanë thirrur mbledhje të zgjeruara për të koordinuar një qëndrim të përbashkët dhe për të vlerësuar pasojat.
Brenda ditëve në vijim pritet të bëhet më e qartë panorama e linjave që kompania do të vijojë të operojë nga Selaniku, ndërsa nuk përjashtohet mundësia që baza të rikthehet në një fazë të mëvonshme.
Kjo lëvizje përputhet me strategjinë e njohur të Ryanair për të zhvendosur kapacitetet drejt tregjeve më fitimprurëse dhe për t’u tërhequr nga aeroportet ku kostot rriten. Një model i tillë është ndjekur më parë edhe në destinacione të tjera europiane.
Duket se vendimi lidhet edhe me zhvillimet në Shqipëri, ku Ryanair ka hapur bazën e saj në Tirana International Airportnë fund të marsit 2026.
Baza në Tiranë është zgjeruar me avionë dhe destinacione të reja dhe po rezulton një treg në rritje të shpejtë për kompaninë, në një kohë kur aeroporti i Tiranës po shënon rekorde të reja të numrit të udhëtarëve dhe zgjerim të vazhdueshëm të trafikut ajror. /skyweb.al
