Kryeministri Edi Rama ka njoftuar nisjen e aktivitetit të avionit të parë zjarrfikës në Shqipëri, i cili i është bashkuar operacioneve për përballimin e zjarreve gjatë muajit gusht.
Përmes një videoje të publikuar në rrjetet sociale, Rama u shpreh se vendi hyn në këtë periudhë me kapacitete më të mëdha se më parë, por paralajmëroi se rreziku i zjarreve ekstreme mbetet i lartë, duke sjellë në vëmendje situatën që po përjetojnë disa vende europiane.
“Avioni i parë zjarrfikës ka nisur aktivitetin si forcë e shtuar e këtij gushti sfidues, i cili na gjen më të fortë e të përgatitur se asnjëherë më parë, por edhe plotësisht të vetëdijshëm për rrezikun e përshkallëzimeve ekstreme të zjarreve përtej fuqive tona. Respekt dhe mirënjohje për të gjitha forcat tona në terren”, shkroi kryeministri.
Pak ditë më parë, gjatë një takimi me efektivët zjarrfikës dhe strukturat e angazhuara në menaxhimin e emergjencave në Bazën Ajrore të Farkës, Rama bëri të ditur se Shqipëria do të pajiset me tre avionë zjarrfikës brenda këtij viti.
Sipas tij, procedurat për blerjen e tyre kanë përfunduar, ndërsa është siguruar edhe një mekanizëm që, në raste emergjencash të mëdha, vendi të ketë në dispozicion avionë shtesë deri në dorëzimin e flotës së re. /skyweb.al
